Tags-Dhoop

mujhe ye dhuup ye barsāt kyuuñ satātī hai
ye baat mujh se mirā sā.ebān pūchhtā hai

dhuup jaisī tamāzateñ har dam
baat hī aur maañ kī chhāñv kī

tumhāre haath chhuḌāne se ruk gayā hai safar
ye dhuup chhāñv musāfir kā mas.ala nahīñ hai

vo tire phuul se din mujh ko bahut yaad aa.e
maiñ ne dekhā jo tirā dhuup meñ jhulsā chehra

dhuup se ham ko bachāne ke liye
roz phailātī rahe par dīvār

agar ghar se niklūñ to phir tez dhuup
magar ghar meñ Dastī huī tīrgī

a mire ham-safaro tum bhī thake-hāre ho
dhuup kī tum to milāvaT na karo chhāñv meñ

mehrbāñ ho jaa.eñ to rañj-o-alam kī dhuup meñ
peḌ kī sūrat ghanerā sā.ebāñ hote haiñ log

chaḌhte sūraj kī kirneñ haiñ daulat izzat shohrat shaan
āḳhir āḳhir har dīvār se yaaro Dhaltī aa.ī dhuup

jaane apnā ruup dikhā kar kis ne parda taan liyā
kis kī khoj meñ āvāra hai añgnā.ī añgnā.ī dhuup

janam janam ke añdhiyāre kā jaadū chhan meñ TuuT gayā
'sābir' aaj mirī kuTiyā meñ chupke se dar aa.ī dhuup

us ko zaḳhm mile duniyā meñ jis ne māñge taaza phuul
jis ne chāhī chhāñv kī chhatrī us ke sar par chhā.ī dhuup

kaun baḌhā.e pyaar kī peñgeñ us naT-khaT banjāran se
phirne ko to nagrī nagrī phirtī hai harjā.ī dhuup

kabhī dahaktī kabhī mahaktī kabhī machaltī aa.ī dhuup
har mausam meñ āñgan āñgan ruup badal kar chhā.ī dhuup

māthe par sindūr kī bindiyā thālī meñ kuchh surḳh gulāb
nuur ke taḌke uushā taT par puujā karne aa.ī dhuup

dānish kī afzūnī akasr kartī hai dil ko gumrāh
tez ziyāda ho to chhīne āñkhoñ kī bīnā.ī dhuup

dhuup hai kyā aur saayā kyā hai ab ma.alūm huā
ye sab khel tamāshā kyā hai ab ma.alūm huā

ye piilī shāḳh par baiThe hue piile parinde
laraztī dhuup kī āġhosh meñ sahme parinde

ye chilchilātī huī dhuup jal rahā hai badan
guzar rahī hai yūñhī hasrat-e-sahāb liye

phailī hai dhuup jazba-e-isfār dekh kar
hargiz Thahar na sāya-e-ashjār dekh kar