Tags-Dhoop

kuchh peḌ bhī be-faiz haiñ is rāhguzar ke
kuchh dhuup bhī aisī hai ki saayā nahīñ hotā

ḳhudā nibāhe ye āshnā.ī hameñ ye ulfat ke laag bhaa.ī
kisī din us par jo dhuup aa.ī yahāñ qalaq se buḳhār aayā

pāniyoñ se ret par jo aa gayā merī tarah
zindagī kī dhuup meñ jaltā rahā merī tarah

maiñ chāhtā thā kisī peḌ kā ghanā saaya
duā.eñ dhuup ne bhejī haiñ sahn bhar ke mujhe

dhuup ke qahr kā Dar hai to dayār-e-shab se
sar-barahna koī parchhā.īñ nikaltī kyuuñ hai

dīvār o dar jhulaste rahe tez dhuup meñ
bādal tamām shahr se bāhar baras gayā

dil ke suune sahn meñ gūñjī aahaT kis ke paañv kī
dhūp-bhare sannāTe meñ āvāz sunī hai chhāñv kī

ik dhuup zindagī ko yuuñ sahrā banā ga.ī
aa.e na is ujaaḌ meñ mausam bahār ke

āñgan thā mirā aur na dar-o-bām the mere
maiñ dhuup meñ thā sāya-e-dar terī taraf thā

kaḌaktī dhuup meñ saaya
añdheroñ meñ ujālā hai

zarā sī dhuup chamkegī saroñ par
pighal jā.eñge mū-e-qad hamāre

dhuup kā ik TukḌā kyuuñ mere sar par saaya kartā hai
kyā mujh ko manzar se haTā kar saare manzar bhīgeñge

mere dasht ko shāyad us ne dekh liyā
dhuup shabnamī har-sū manzar dhānī hai

bāhar dhuup samundar surḳh bagūle bhī
andar har ḳhuliye meñ rut barfānī hai

har taraf ye dhuup har-dam tez-tar hotī huī
mom kā ik shahr lekin jo pighaltā bhī nahīñ

naqsh-garī kā buutā ho to dhuup chhāñv meñ rañg bahut
chehra ḳhud ban jā.egā teḌhī-meḌhī ashkāl ke baad

ye chaḌhtī dhuup kā malbūs utaar de sar-e-shām
utartī dhuup meñ ab dekhtā hai shahr tujhe

ye dhuup chhāñv kā khel hai yā ḳhizāñ bahāroñ kī ghaat meñ hai
nasīb sub.h-e-urūj ho to nazar meñ shām-e-zavāl rakhnā

hañs rahā huuñ bebasī kī dhuup meñ
ho rahī hai zauq kī taskīn kyā

bebasī kī dhuup hai ġhamgīn kyā
phir rahā hai dar-ba-dar miskīn kyā