Tags-Dhoop

maiñ dekhtā huuñ
shāḳh-e-umr zard mausamoñ kī dhuup meñ

mere āñgan meñ khilī dhuup kā asrār hai kyā
uTh ke dekhūñ to sahī vo pas-e-dīvār na ho

barf ke phuul khile dhuup ke daane nikle
ab ke mausam meñ sabhī ḳhvāb suhāne nikle

mujhe aur kuchh nahīñ chāhiye ye duā.eñ haiñ mare sā.ebāñ
kaḌī dhuup meñ kahīñ mil sakeñ to yahī chhateñ mujhe chāhiyeñ

dasht-e-ulfat meñ kaḌī dhuup ke sannāTe haiñ
abr-e-ḳhush-rañg na saa.e kā guzar rahtā hai

din bhar to maiñ duniyā ke dhandoñ meñ khoyā rahā
jab dīvāroñ se dhuup Dhalī tum yaad aa.e

ġhamoñ kī dhuup meñ milte haiñ sā.ebāñ ban kar
zamīñ pe rahte haiñ kuchh log āsmāñ ban kar

dhuup aur bārish bhejne vaale merī bhī sun lenā
tere baaġh ke goshe meñ ik kachchā phuul hai merā

buland peḌoñ ke sabz pattoñ meñ sat.h-e-dariyā kī silvaToñ par
havā ke jhoñkoñ se dhuup ke jhilmilāte taare thirak rahe haiñ

safed baal hue shab huī javānī kī
damīda sub.h huī chauñk sar pe dhuup aa.ī

dhuup itnī hai band huī jaatī hai aañkh
aur palak jhapkūñ to manzar jaatā hai

abhī nahīñ hai mujhe maslahat kī dhuup kā ḳhauf
abhī to sar pe baġhāvat kā shāmiyāna hai

dhuup kī qāsheñ hare maḳhmal pe zau dene lagīñ
saa.e kamroñ se nikal kar sehn meñ aane lage

zulf o ruḳh ke saa.e meñ zindagī guzārī hai
dhuup bhī hamārī hai chhāñv bhī hamārī hai

vo dhuup hai ki havā phuul hai ki shabnam hai
kabhī to dekh use sāhib-e-nazar kī tarah

maiñ bayābāñ kī bikhartī dhuup huuñ be-samt-o-saut
ab koī saudā hai sar meñ aur na tū āñkhoñ meñ hai

tab rañj khule dhuup gañvā dene ke ham par
in sīm-zada kunjoñ meñ jab ghaas na aa.ī

sāmne āñkhoñ ke phir yaḳh-basta manzar aa.egā
dhuup jam jā.egī āñgan meñ december aa.egā

abhī dhuup āñgan meñ khul ke na aa.ī
abhī raat se rabt TuuTā nahīñ hai

najāt dhuup se miltī to kis tarah miltī
mirā safar to miyāñ dasht-e-be-shajar meñ thā