Tags-Dhoop

shadīd garmī meñ kaise nikle vo phūl-chehra
so apne raste meñ dhuup dīvār ho rahī hai

tum pasīna mat kaho hai jāñ-fishānī kā libās
dhuup meñ chalte hue rakhte haiñ paanī kā libās

raat meñ dhunkā huā sūraj paḌā thā
din meñ 'mājid' dhuup kaalī ho ga.ī hai

ham aise peḌ haiñ jo chhāñv bāñdh kar rakh deñ
shadīd dhuup meñ ḳhud saa.e ko taraste haiñ

lahū se uTh ke ghaTāoñ ke dil baraste haiñ
badan chhatoñ kī tarah dhuup meñ jhulaste haiñ

'humairā' dhyān rakhnā Dūbte sūraj kī aahaT kā
sadā chaḌhtī utartī dhuup kī paimā.isheñ karnā

dhuup ujlā.e mirā chehra ki maiñ bhī sochūñ
saa.e ne kaise ḳharāshoñ ko chhupā.e rakkhā

peḌ jalte rahe āvāra rahī gard-e-malāl
dhuup ne abr kī chhāñv ko chhupā.e rakkhā

tasavvurāt ke phūloñ meñ rañg bhartā hai
haqīqatoñ kī kaḌī dhuup detī hai in.aam

mire saath chalne ke shauq meñ baḌī dhuup sar pe uThā.egā
tirā naak naqsha hai mom kā kahīñ ġham kī aag ghulā na de

bunī haiñ sāzisheñ mausam ne dhuup se mil kar
havā ne mere har ik phuul ko ḳharāshā hai

sajā ke dhuup kaḌī aaj ghar se nikle haiñ
kisī ke saa.e ko zer-e-qabā bhī rakkhā hai

maiñ thak chukā huuñ dasht-e-masāfat kī dhuup meñ
koī sarāb raah marī dekhtā na ho

be-dar-o-bām Thikānā jis meñ dhuul dhuup sannāTā ġham
vahī hai mujh vahshī ke ghar meñ jo kuchh hai vīrānoñ meñ

dhuup phailī to kahā dīvār ne jhuk kar mujhe
mil gale mere musāfir, mere saa.e ke habīb

tū bhī ruḳhsat ho rahā hai dhuup bhī Dhalne ko hai
mere andar ik charāġh-e-shām-e-ġham jalne ko hai

balā kī dhuup hai 'ja.afar' kisī ko hosh nahīñ
paḌā hai abr kā saayā kahāñ kahāñ na paḌā

jāñ-ba-lab vaise hī the aur hameñ maar chalā
dhuup ke saath kahāñ sāya-e-dīvār chalā

ināyateñ haiñ tirī dhuup sard mausam kī
baḌhe jo had se to baiThe bhalā kahāñ koī

chhatoñ pe bārish duur pahāḌī halkī dhuup
bhīgne vaalā pañkh sukhāne vaalā maiñ