Tags-Dhoop

zid meñ aa kar chhoḌ rahī hai un bāñhoñ ke saa.e
jal jā.egī mom kī guḌiyā duniyā dhūp-sarā.e

ab tak jalā rahī hai hameñ tohmatoñ kī dhuup
ham to ujaaḌ ho ga.e fasl-e-vafā ke ba.ad

nadāmat kī kaḌī dhuup meñ nahā.e hue
ziist ke is kaḌe kos paḌāv meñ

dhuup sahrā tan barhana ḳhvāhisheñ yādoñ ke khet
shaam aate hī ġhubār-e-rah-guzar ho jā.eñge

jis kī buniyādoñ meñ shab kā husn hai
aisī kaalī dhuup kā saaya huuñ maiñ

dhuup hai phailī huī sharq se tā-ġharb magar
bāñTtā phirtā hai duniyā ko ujālā pāgal

jaisī apnī ain hai utnī hī apnī dauḌ-dhūp
qais mahmil kī taraf ham sham-e-mahfil kī taraf

dhuup ke shuul bikhre haiñ har suuñ
chāñdnī kā ḳhumār jhūTā hai

ik ik kar ke dhuup ke saare surḳh parinde mar jaate haiñ
ret ke zard samundar par jab sūraj paañv dho jaatā hai

masarratoñ kī dhuup un ke flat meñ hai raat din
hamāre ġham kī bastiyoñ meñ karb-e-jāvedāñ rahe

ḳhirad kī tez dhuup meñ junūñ kā sā.ebāñ khilā
maiñ biij bo chukā so ab shajar meñ kitnī der hai

sar pe sūraj thā to naqsh-e-pā bhī raushan the 'samad'
dhuup ke Dhalte hī saa.e paañv phailāne lage

haq mirā mujh ko mire yaar nahīñ dete haiñ
dhuup meñ sāya-e-dīvār nahīñ dete haiñ

koī saaya to milā dhuup ke zindānī ko
merī vahshat tirī chāhat ko duā detī hai

dhuup kā sahrā nazar aatā hai ab chāroñ taraf
aap to har peḌ kā saayā uThā kar le ga.e

dhuup ke saa.e meñ chup sādhe hue
kar rahe ho amn kā elaan kyā

dhuup ke saath gayā saath nibhāne vaalā
ab kahāñ aa.egā vo lauT ke aane vaalā

taḌap kar āñganoñ meñ dhuup bikhrī
galā bargad kā phir kaaTā gayā hai

kabhī sochā bhī na thā ki
dhuup aur chhāñv ke khel meñ yak-dam

vo dhuup ke chhappar hoñ yā chhāñv kī dīvāreñ
ab jo bhī uThā.eñge mil jul ke uThā.eñge