Tags-Dhoop

zindagī ke āñgan meñ dhuup hī nahīñ utrī
apne sard kamre se kitnī baar niklā maiñ

yuuñ dhuup ne ab zāviya badlā hai ki 'āsim'
saaya bhī mirā mere barābar meñ nahīñ hai

barf pighlegī jab pahāḌoñ par
dhuup meñ shahr jal gayā hogā

yuuñ bhī panāh-e-sāya kaḌī dhuup meñ milī
āñkheñ jhukā.īñ aur tujhe yaad kar liyā

sulagtī dhuup meñ socho safar kaise kaTā hogā
mirī manzil thī kyā aur tum ne kyā rasta dikhāyā thā

māmūr thiiñ sūraj kī gavāhī pe havā.eñ
phir saa.e kahāñ dhuup kī jāgīr uThāte

pī rahā hai zindagī kī dhuup kitne pyaar se
duur jo baiThā huā hai sāya-e-dīvār se

chalo ik dūsre kī ḳhvāhishoñ kī dhuup meñ
jalte hue āñgan kī vīrānī meñ āñkheñ band kar leñ aur baras jaa.eñ

balā kī dhuup hai dasht-e-talab meñ ai dil-e-nādāñ
yahāñ kis aarzū kā sā.ebāñ nazdīk paḌtā hai

ajiib dhuup sar-e-sehn-e-tan utar aa.ī
mizāj tursh huā bāñkpan tamām huā

ruuh tak dhuup aa ga.ī merī
ḳhvāb kahne lagā hai chal uTh jā

gaate hue peḌoñ kī ḳhunuk chhāñv se aage nikal aa.e
ham dhuup meñ jalne ko tire gaañv se aage nikal aa.e

biich meñ soī huī thī ātish-e-ā.indagāñ
ek pairāhan kī ThanDak dhuup kī chādar meñ thī

maiñ der se dhuup meñ khaḌā huuñ
saaya saaya pukārtā huuñ

jaate hue har chiiz yahīñ chhoḌ gayā thā
lauTā huuñ to ik dhuup kā TukḌā nahīñ miltā

aise ik tapte safar kī dāstāñ thī zindagī
dhuup thī saa.e meñ lekin dhuup meñ saaya na thā

kabhī dhuup ho tum kabhī chāñdnī
samajh kar bhī koī na samjhā tumheñ

aaj qistoñ meñ dhuup utrī hai par baḌe karr-o-farr se utrī hai
aaj sūraj hai Dūbne ko magar dhuup ke naqsh-e-pā haiñ āñgan par

itnā nam-dīda thā libās-e-vajūd
dhuup kam paḌ ga.ī sukhāne meñ

zarā aage gayā to phuul bhī the narm saa.e bhī
nazar to dhuup kā ik zard ḳhitta duur tak aayā