Tags-Dhoop

shabāb yaad dilāte hai sar-safedī-e-'bahr'
hai āftāb-e-javānī kī ye nishānī dhuup

safar saqar hai hazāroñ balā.eñ sar par haiñ
hai ek un meñ se āseb-e-āsmānī dhuup

hameñ to fasl-e-zamistāñ bahut ḳhush aatī hai
vo ThanDī ThanDī havā aur vo suhānī dhuup

muvāfaqat na kabhī sard-o-garm meñ hogī
hai chāñdnī mirī piirī tirī javānī dhuup

tap-e-firāq vo bad hai chaḌhe jo sūraj ko
pighal ke barf kī sūrat ho paanī paanī dhuup

safed baal hue jaise tevar aate haiñ
bahut za.iif ko dete hai sargirānī dhuup

zarā sī garm havā meñ ye muñh banātī haiñ
na kar sakegī guloñ kī mizāj-dānī dhuup

hamāre daaġh ko jab āftāb ne dekhā
huā ye zard nazar aa.e za.afrānī dhuup

rahe shagufta ham is tarah jaise aag ke phuul
kabhī na dasht-navardī meñ ham ne paanī dhuup

amiir shāl-doshāloñ meñ garm rāhat-o-aish
ġharīb ke liye jāḌoñ meñ zindagānī dhuup

kabhī to dekhe hamārī araq-fishānī dhuup
jale bhavoñ pe kare apnī mehrbānī dhuup

kaTe jo raat bhī zaḳhmī-e-hijr ko to kyā
hai maar Dālne ko chāñdnī kī saanī dhuup

ajab nahīñ gul-e-ruḳhsār sausanī ho jaa.eñ
bahār-e-husn ko hai āfat-e-ḳhizānī dhuup

tah-e-sahāb rahe āftāb-e-roz-e-firāq
shuāoñ se na kare mujh pe teġh-rānī dhuup

lagā.e abr kā lukkā na kis tarah chhatrī
kare na chāñd se rañgat ko āsmānī dhuup

mujhe chhoḌā hai taptī dhuup meñ jis shaḳhs ne tanhā
use bhī ġham kī duniyā meñ akelā likh diyā jaa.e

dhuup kī chādar mire sūraj se kahnā bhej de
ġhurbatoñ kā daur hai jāḌoñ kī shiddat hai bahut

dīvār pighaltī hai jhulas jaate haiñ saa.e
ye dhuup nigāhoñ kī bahut tez hai yaaro

chilchilātī dhuup ne ġhussa utārā har jagah
chaḌh gayā ūñchā.ī par zehnoñ kā paarā har jagah

din bhar dhuup kī tarah se ham chhā.e rahte haiñ duniyā par
raat huī to simaT ke aa jaate haiñ dil kī guphāoñ meñ