Tags-Dhoop

'aḳhtar' ab intizār kī parchhā.iyāñ sameT
is dhuup meñ vo mom kā paikar na aa.egā

pighaltī kyuuñ na bhalā barf ajnabiyyat kī
nazar kī dhuup jo Thahrī thī sard chehre par

zamīñ pe dil kī mohabbat javān hotī rahī
vafā kī dhuup pe bādal jafā ke chhāne tak

garm lahū kā sonā bhī hai sarsoñ kī ujyālī meñ
dhuup kī jot jagāne vaale sūraj ghol piyālī meñ

kabhī dasht meñ ḳhaar pe hai chalnā, kabhī aag kā phuul meñ hai Dhalnā
kabhī tanhā dhuup meñ hai chalnā, use ishq kā hī in.aam likho

tujhe ham dopahar kī dhuup meñ dekheñge ai ġhunche
abhī shabnam ke rone par hañsī ma.alūm hotī hai

ab mirī zaat meñ bas ek kī gunjā.ish hai
maiñ huā dhuup to saaya nahīñ ho pā.ūñgā

ahl-e-ḳhirad ke saa.e se ye dhuup hī bhalī
detā hai mashvara mirā dīvāna-pan mujhe

utrī huī hai dhuup badan ke hisār meñ
qurbat ke fāsloñ kā safar kāTne ke ba.ad

zindagī dhuup meñ basar kī hai
baat lambī thī muḳhtasar kī hai

harī masjid kī halkī dhuup meñ
taaza vazū se giile paañv

koī naġhma dhuup ke gaañv sā koī naġhma shaam kī chhāñv sā
zarā in parindoñ se pūchhnā ye kalām kis kā kalām hai

aatā agar ḳhayāl shajar chhāñv meñ nahīñ
ghar se nikal ke dhuup kī hiddat ko dekhtā

dekhnā ye hai ki kaun aatā hai saaya ban kar
dhuup meñ baiTh ke logoñ ko bulāyā jaa.e

zindagī kī ai kaḌī dhuup bachā le mujh ko
pīchhe pīchhe ye mire maut kā saaya kyā hai

ras kī har lahr ke ajab mausam
dhuup ke poh chāñdnī ke asāḌh

tum saḳhtī-e-rāh kā ġham na karo har daur kī raah meñ ham-safaro
jahāñ dasht-e-ḳhizāñ vahīñ vādī-e-gul jahāñ dhuup kaḌī vahāñ chhāñv ghanī

hai bādaloñ ke siyāh ghoḌoñ ke saath varna havā kī parchhā.īñ kis ne dekhī
dhulī dhulī dhuup ke badan par jo chhāñv jaisī subuk-ravī hai vo shā.irī hai

zindagī dasht-e-safar dhuup hī dhuup
tere bin kaise kahāñ ke saa.e

kaḌī hai dhuup shajar hai na sāya-e-dīvār
bichhaḌ ke us se sukūñ-nā-chashīda haiñ ham log