Tags-Dhoop

dard kī dhuup Dhale ġham ke zamāne jaa.eñ
dekhiye ruuh se kab daaġh purāne jaa.eñ

saaya hai pyaar kā na mohabbat kī dhuup hai
dīvār ke hisār ko ghar kah diyā gayā

chhāñv se us ne dāman bhar ke rakkhā hai
jis ne dhuup ko uupar sar ke rakkhā hai

us ke ruḳhsār sub.h-e-daraḳhshāñ sahī us kī zulfoñ meñ shām-e-ġharībāñ sahī
dhuup aur chhāñv kī tarah vo ḳhud-nigar sāmne mere aa.e to maiñ kyā karūñ

vo dhuup hai āñkhoñ meñ ki jal jaatī hai har shaam
manzar hai dhuāñ koī lab-e-bām nahīñ hai

zulm kī dhuup meñ nafrat to panap saktī hai
pyaar to phuul hai is dhuup meñ mar jā.egā

aaj kyā dhuup tum ko chaaT ga.ī
aaj tum sā.ebān meñ bhī nahīñ

aisī taqsīm kī sūrat nikal aa.ī ghar meñ
dhuup ne hijr kī dīvār uThā.ī ghar meñ

maiñ ne lamhoñ meñ guzārī haiñ hazāroñ sadiyāñ
vaqt kī dhuup meñ pighlā huā dariyā dekhā

dard kī dhuup Dhale aas kā mausam nikhre
tere imkān kā paudā jo shajar ho jaa.e

khilegī dhuup to vaadī kā rañg nikhregā
abhī to os kī ik dhund hai nazāre meñ

na jaane niiñd se kab ghar ke log jāgeñge
ki ab to dhuup chalī aa.ī hai osāre meñ

sahrā kī dhuup meñ bhī shajar dekhte rahe
kyā log the duā kā asar dekhte rahe

saa.e meñ baiThe hue sochte haiñ
kaun is dhuup meñ chaltā hogā

kaun hai merā ḳharīdār nahīñ dekhtā maiñ
dhuup meñ sāya-e-dīvār nahīñ dekhtā maiñ

chhantī hai jañgaloñ meñ daraḳhtoñ se raushnī
dhabbe haiñ kaise dhuup ke chāroñ taraf yahāñ

sham-e-badan bhī the ka.ī rāh-e-junūñ meñ ham-safar
tāb-e-muqāvamat na thī dhuup paḌī pighal ga.e

nākāmiyoñ kī dhuup meñ jalte haiñ dil-jale
sahrā-e-ġham meñ sāya-e-dīvār hai kahāñ

ik yahī vasf hai is meñ jo amar lagtā hai
vo kaḌī dhuup meñ bargad kā shajar lagtā hai

saath apne ġhamoñ kī dhuup rahī
saath ik sarv-e-sāya-dār rahā