Tags-Dhoop

is shahar-e-kasāfat meñ aa kar ojhal hue ā.ankhoñ se manzar
vo gaañv kā sabza vo bahr-o-bar vo dhuup vo barq-o-bārāñ bhī

apne apne lahū kī udāsī liye saarī galiyoñ se bachche palaT ā.eñge
dhuup kī garm chādar simaTte hī phir ye sunahrī parinde palaT ā.eñge

mubārak tujh ko ai sarv-e-ḳhirāmāñ
javānī dhuup jaise dopahar kī

mohabbatoñ ke ḳharāboñ meñ dhuup kam niklī
kabhī judā.ī ke kohre kabhī malāl kī gard

kisī daraḳht se sīkho salīqa jiine kā
jo dhuup chhāñv se rishta banā.e rahtā hai

abr ke TukḌoñ ne dīvāreñ banā diiñ jā-ba-jā
dhuup se jaltī fazā kī be-karānī dekh kar

āñsuoñ se dhulī zamīnoñ par
ab zarā dhuup ko bhī rone do

raushan chehra bhīgī zulfeñ duuñ kis ko kis par tarjīh
ek qasīda dhuup kā likkhūñ ek ġhazal barsāt ke naam

jaltī dhuup meñ chāñd kā tohfa kyā kartī
shāyad maiñ dālān meñ rakh kar bhuul ga.ī

ye intiqām hai yā ehtijāj hai kyā hai
ye log dhuup meñ kyuuñ haiñ shajar ke hote hue

ye haal hai to badan ko bachā.iye kab tak
sadā meñ dhuup bahut hai lahū meñ lū hai bahut

aañsū kī ek buuñd ko āñkheñ taras ga.iiñ
is dhuup meñ jhulas gayā dohā kabīr kā

har taraf dhuup kī chādar ko bichhāne vaalā
kaam par niklā hai duniyā ko jagāne vaalā

bārish ho dhuup meñ ki dhanak āsmāñ pe ho
āñkheñ na hoñ to ye bhī nazāroñ kī maut hai

kabhī din kī dhuup meñ jhuum ke kabhī shab ke phuul ko chuum ke
yuuñ hī saath saath chaleñ sadā kabhī ḳhatm apnā safar na ho

yā to apne jism kī had se nikalnā chhoḌ de
saaya hai to dhuup se inkār kar saktā nahīñ

us naar meñ aisā ruup na thā jis ruup se din kī dhuup dabe
is shahr meñ kyā kyā gorī hai mahtāb-ruḳhe gulnār-labe

chāñd jab dhuup meñ nikaltā hai
chāñdnī kab nazar meñ aatī hai

dhuup kī aañch hai jo raat ga.e
chāñdnī ban ke muskurātī hai

mere saath lagā rahtā hai yādoñ kā bādal
dhūp-bhare rastoñ par us ne saaya chhoḌ diyā