Tags-Dhoop

jhulsā jhulsā hai kyuuñ badan saarā
aa ga.ī dhuup sā.ebān meñ kyā

dhuup aa.ī nahīñ makān meñ kyā
abr gahrā hai āsmān meñ kyā

sabhī kā dhuup se bachne ko sar nahīñ hotā
har aadmī ke muqaddar meñ ghar nahīñ hotā

kuchh aisī dhuup thī un ke saroñ par
ḳhudā jaise ġharīboñ kā nahīñ thā

hamāre paas faqat dhuup hai ḳhayāloñ kī
jhulaste ḳhvāboñ kī dukkān le ke aa.e haiñ

kis kā chamaktā chehrā laa.eñ kis sūraj se māñgeñ dhuup
ghuur añdherā chhā jaatā hai ḳhalvat-e-dil meñ shaam hue

daaġh vāloñ ke nasheman shab ko bhī chhupte nahīñ
dhuup sī phailī huī hai baaġh kī dīvār par

jo shahr-e-dard meñ thā ghanī chhāñv kā shajar
kuchh dhuup thī kaḌī ki ḳhalā meñ utar gayā

sāya-e-dīvār jo roz-e-qayāmat meñ na thā
mirg-chhālā apnā vaañ ham ne bichhāyā dhuup meñ

dhuup kā ehsās jaane kyuuñ use hotā nahīñ
vaqt āvāra hai ThanDī chhāñv meñ hotā nahīñ

vo din ki bojh kaḌī dhuup meñ uThātā rahā
maiñ ratjagoñ kī thakan oḌhtī bichhātī rahī

rishtoñ ko jab dhuup dikhā.ī jaatī hai
cigarette se cigarette sulgā.ī jaatī hai

jism hamārā ik aisī mil hai jis meñ
añdhiyāroñ se dhuup banā.ī jaatī hai

zehn meñ sochoñ kā sūraj barf kī sūrat na rakh
kohr ke dīvār-o-dar par dhuup kā ġhāza lagā

zamīñ na.ī thī anāsir kī ḳhū badaltī thī
havā se pahle jazīre pe dhuup chaltī thī

raushan chehra bhīgī zulfeñ duuñ kis ko kis par tarjīh
ek qasīda dhuup kā likkhūñ ek ġhazal barsāt ke naam

vaqt ke sahrā meñ nañge paañv Thahre ho 'salīm'
dhuup kī shiddat yakāyak baḌh na jaa.e chal paḌo

jab talak saa.e meñ baiThe ho ġhanīmat jaano
duur tak dhuup kā sahrā hai shajar se aage

use tum dhuup meñ barsāt meñ kohre meñ rakh dekho
'pavan' vo aa.ina hai jo kabhī dhuñdhlā nahīñ hotā

sūraj ke qātil
dhuup señkne kahāñ jā.egī