Tags-Dhoop

koī shai nahīñ yahāñ mustaqil ye ajab yahāñ kā nizām hai
kabhī dhuup hai kabhī chhāñv hai kabhī sub.h hai kabhī shaam hai

kuchh ho gayā hai dhuup se ḳhākistarī badan
kuchh jam gayā hai raah kā mujh par ġhubār bhī

har taraf taptī huī dhuup thī ai umr-e-ravāñ
duur tak dasht-e-alam meñ koī saayā bhī na thā

dhuup jā-e-qarār sāyoñ kī
har bagūla masāfatoñ kā mazā

ik zarā sī dhuup ko le kar ye hañgāma huā
merī hī parchhā.iyoñ ne rauñd Daalā hai mujhe

is qadar dhuup meñ shiddat thī ki ghabrā kar dil
saa.e kī aas meñ be-sāya shajar tak pahuñchā

chilchilātī dhuup ġham kī hādsoñ ke sā.ebāñ
soch kā taptā ye sahrā aur ye purvā.ī ki bas

vo taptī dhuup se jab sāya-e-dīvār tak aa.e
to jaatī dhuup ke manzar lab-e-iz.hār tak aa.e

ik ḳhvāb-gūñ sī dhuup thī zaḳhmoñ kī aañch meñ
ik sā.ebāñ sā dard kī purvā.iyoñ meñ thā

zindagī dhuup meñ aane se khulī
saaya dīvār uThāne se khulā

baras rahī thī haqīqat kī dhuup ghar bāhar
sahm ke aañkh ke āñchal meñ kho ga.e sapne

dhuup chhūtī hai badan ko jab 'shamīm'
barf ke sūraj pighal jaate haiñ kyuuñ

sub.h se pahle badan kī dhuup meñ niiñd aa ga.ī
aur kitnā jāgtā maiñ raat kā jaagā huā

ye ab gharoñ meñ na paanī na dhuup hai na jagah
zamīñ ne 'talḳh' ye shahroñ ko bad-duā dī hai

zamīn dī hai khulī dhuup dī havā dī hai
ba-nām-e-zindagi kaisī kaḌī sazā dī hai

mere maazī ke chaman meñ the jo kuchh yādoñ ke phuul
rafta rafta zindagī kī dhuup meñ kumhlā ga.e

ik naam se dhuup meñ barkhā rut
ik ism tilism-jabīnoñ kā

kisī ke dil meñ utarnā hai kār-e-lā-hāsil
ki saarī dhuup to hai āftāb se bāhar

chhāñv afsos dā.imī na rahī
dhuup kā kyā rahī rahī na rahī

saa.e meñ ḳhushiyoñ ke kitne log mere saath the
dhuup ġham kī phailte hī maiñ akelā ho gayā