Tags-Dhoop

dhuup kā phuul girā shāḳh-e-shafaq se jis dam
din kā chehra nazar aatā thā shikan-dār bahut

saroñ pe abr-kushā dhuup kī tamāzat thī
'najīb' zer-e-qadam ret kā samundar thā

na jaane dhuup ne apnī zabāñ meñ kyā kah us se
shajar ke jism se saaya nikal kar ban gayā apnā

safar meñ saath apne dhuup dariyā aur samundar the
hamārī ḳhush-nasībī thī samundar ban gayā apnā

jaane kyā baat hai mausam meñ 'ziyā' ab ke baras
dhuup ke hote hue barf jamī rah ga.ī hai

bojh sūraj kā to maiñ kab kā utaar aayā magar
dhuup jo sar pe dharī thī so dharī rah ga.ī hai

shāḳh hilī to Dar gayā dhuup khilī to mar gayā
kaash kabhī to jiite jī sub.h kā sāmnā karūñ

tum khul rahe the ġhair se chhāñv tale khaḌe
ham dast-e-rashk dhuup meñ apne male khaḌe

niiñd aa jaa.e to phir dhuup na saaya koī
paañv thak jaa.eñ to pardes bhī ghar lagtā hai

dhuup meñ de ke saaya ye būḌhe shajar
kitne peḌoñ ko shāḳheñ harī de ga.e

sar par hamāre dhuup kī chādar sī tan ga.ī
ghar se chale to shahr ke manzar badal ga.e

rahegī dhuup mire sar pe āḳhirī din tak
javāñ hai peḌ magar us kā aasrā kyā hai

rañg pakkā ho chalā thā yaad aatā hai magar
dhuup mere jism par tab Thiik se bhīgī na thī

is qadar bhī rañj kā ḳhūgar nahīñ huuñ maiñ abhī
rāste meñ dhuup ho to ik shajar bhī chāhiye

jiine kā hausla kabhī marne kī aarzū
din yuuñ hī dhuup chhāñv meñ apne bhī kaT ga.e

jahāñ Daale the us ne dhuup meñ kapḌe sukhāne ko
Tapaktī haiñ abhī tak rassiyāñ āhista āhista

peḌoñ se jab nīche utre
baal sukhāne aa.e dhuup

kyā batā.ūñ tujhe
maiñ kaḌaktī huī dhuup meñ pā-barahna kahāñ tak chalī

use bhī pyaar ke mausam pasand haiñ 'jāzib'
safar kī dhuup meñ jalne shajar bhī aatā hai

kahīñ chhāñv hai kahīñ dhuup hai kahīñ aur hī koī ruup hai
ka.ī chehre is meñ chhupe hue ik ajiib sī ye naqāb hai