Tags-Dhoop

kaT ga.ī jaisī bhī kaTnī thī yahāñ dhuup ke saath
ab kisī saa.e kā ehsān nahīñ chāhtā maiñ

aisā huā ki niiñd bhī rasta bhaTak ga.ī
sūraj bhī jaltī aañkh meñ sab dhuup bhar gayā

ik ḳhvāb thā jo mujh se bayāñ ho nahīñ sakā
ik rañg thā jo dhuup se Takrā ke mar gayā

balā kī dhuup meñ aise bhī jism jaltā rahā
badan kā saaya jo apne siroñ se Dhaltā rahā

dard kī dhuup meñ sahrā kī tarah saath rahe
shaam aa.ī to lipaT kar hameñ dīvār kiyā

suhāne mausamoñ meñ us kī tuġhyānī qayāmat thī
jo dariyā garmiyoñ kī dhuup meñ pāyāb rahtā thā

ham-sā.e kī ūñchī dīvāroñ se itnā farq paḌā
pahle ghar meñ dhuup aa jaatī thī ab saayā aatā hai

rūnumā ho chaman-e-dahr meñ ai abr-e-nashāt
dard kī dhuup meñ sañvlā.ī haiñ komal rūheñ

zindagī tez dhuup kā dariyā
aadmī naav mom kī 'anjum'

shauq chaḌhtī dhuup jaatā vaqt ghaTtī chhāñv hai
bā-vafā jo aaj haiñ kal be-vafā ho jā.eñge

us ke kūche se za.īfī meñ bhī uTThe na qadam
sar pe dhuup aa ga.ī dīvār kā saayā na gayā

dhuup tālāb kā huliya to badal saktī hai
itnī āsānī se chhuTtī nahīñ kaa.ī sāhab

kab tak ye ḳhvāb-e-ġhaflat jaago 'urūj' jaago
ab dhuup baḌhte baḌhte sar par hī aa ga.ī hai

rāh-e-dushvār hai be-sāya shajar haiñ saare
dhuup hai sar pe qadam tez baḌhāte chaliye

ise tere ġham kī ḳhabar na ho to har ek ġham ko chhupā.e rakh
vo harī rutoñ kā gulāb hai use dhuup rut se bachā.e rakh

maiñ nāptā chalā qadmoñ se apne saa.e ko
kabhī jo dasht-e-masāfat meñ dhuup Dhalne lagī

shahr-e-gulāb meñ bhī koī DhūñDhtā rahā
vo dhuup jis meñ tere badan kā shajar bhī hai

dam lo na kahīñ dhuup meñ chalte raho 'bāqī'
apne liye ye sāya-e-ashjār nahīñ hai

saaya saroñ pe dhuup meñ karne kī baat thī
ye nek kaam kyuuñ pas-e-dīvār karte ho

tirī ḳhāmoshiyoñ kī dhuup meñ bhī
tirī āvāz meñ bhīgā rahūñgā