Tags-Dil

bahlā rahā huuñ dil ko fareb-e-ḳhayāl se
ummīd-e-ġham-gusārī-e-yārāñ kiye hue

ahbāb-e-ḳhush-mazāq kā ehsān hai ye 'rāz'
muddat huī thī dil ko ġhazal-ḳhvāñ kiye hue

pareshāñ ho ke merī ḳhaak āḳhir dil na ban jaa.e
jo mushkil ab hai yā rab phir vahī mushkil na ban jaa.e

dard-e-ālam bhī kahīñ dard-e-mohabbat hī na ho
dil ke bahlāne kī ye bhī koī sūrat hī na ho

jur.at-e-iztirāb-e-dil tū ne batā ye kyā kiyā
un kī bhī baat aa ga.ī koshish-e-arz-e-hāl meñ

jān-e-hazīñ nahīñ faqat mahv-e-fuġhān-e-ārzū
rauñdā huā sā dil bhī hai hasrat-e-pā.emāl meñ

'tābish' har ek dil meñ sharāre the qahr ke
ho paas jis ke soz-e-bilālī koī na thā

na kisī se karam kī ummīd rakheñ na kisī ke sitam kā ḳhayāl kareñ
hameñ kaun se rañj mile haiñ na.e ki jo dil ke ziyāñ kā malāl kareñ

dil ne chhoḌā hai na chhoḌe tire milne kā ḳhayāl
bār-hā dekh liyā ham ne malāmat kar ke

dil ne paayā hai mohabbat kā ye aalī rutba
aap ke dard-e-davā-kār kī ḳhidmat kar ke

chheḌ se ab vo ye kahte haiñ ki sambhlo 'hasrat'
sabr o tāb-e-dil-e-bīmār ko ġhārat kar ke

gale se dil ke rahī yuuñ hai zulf-e-yār lipaT
ki juuñ sapere kī gardan meñ jaa.e maar lipaT

mire dil kī udaas vaadī meñ
ġhuncha-hā-e-malūl khilte haiñ

jism ke gharauñde meñ aag shor kartī hai
dil meñ jab mohabbat kī chāñdnī utartī hai

shaam ke dhuñdlakoñ meñ Dūbtā hai yuuñ sūraj
jaise aarzū koī mere dil meñ martī hai

duur mujh se rahte haiñ saare ġham zamāne ke
terī yaad kī ḳhushbū dil meñ jab Thahartī hai

gayā hai jab kabhī dil par gayā hai
ye merā haath mushkil par gayā hai

ab to is dil meñ nahīñ kuchh bhī bachā tere sivā
in meñ yādoñ ke na.e zaḳhm jo paale haiñ tire

'sabā' dariyā kā dil bhī jhuum uTThā
kisī kā naam paanī par likhā to

koī dilkash nazāra ho koī dilchasp manzar ho
tabī.at ḳhud bahal jaatī hai bahlā.ī nahīñ jaatī