Tags-Dil

mujhe dil kī ḳhatā par 'yās' sharmānā nahīñ aatā
parāyā jurm apne naam likhvānā nahīñ aatā

ḳhudā hī pahuñche fariyādoñ ko ham se be-nasīboñ ke
hamāre dil kabāb aur tū piye pyāle raqīboñ ke

ḳhizāñ meñ barg-e-gul aur ḳhār-o-ḳhas nahiñ sehn-e-gulshan meñ
paḌe haiñ laḳht-e-dil aur TuuTe naale andalīboñ ke

ġhamoñ kī duniyā ko rauñd Dāleñ nashāt-e-dil pā.emāl kar leñ
na.ī mohabbat nayā junūñ hai ḳhudāyā kyā apnā haal kar leñ

dil ḳhvāb kī ġhaflat se mabādā kahīñ chauñke
ye fitna-e-ḳhvābīda hī bedār na hove

ishq ahl-e-vafā biich use qadr hai kyā ḳhaak
vo dil ki jo gard-e-rah-e-dildār na hove

suntā nahīñ kisū hī kī vo yaar dekhnā
kiijo na us se hāl-e-dil iz.hār dekhnā

mirī zindagī kī kitāb kā hai varaq varaq yuuñ sajā huā
sar-e-ibtidā sar-e-intihā tirā naam dil pe likhā huā

ye chamak-damak to fareb hai mujhe dekh gahrī nigāh se
hai libās merā sajā huā mirā dil magar hai bujhā huā

bujhtī sham.a kī sūrat kyuuñ afsurda khaḌe ho khiḌkī meñ
dekho shaam hai kis darja dilkash is dhuup kī vardī meñ

bahut duur pīchhe ko us bahr ke māvarā
har na.ī dil-kushā agnī munjamid

to āḳhir sāz-e-hastī kyuuñ tarab-āhañg-e-mahfil thā
nashāt-ā.īn kaif-e-be-dilī yārab agar dil thā

maqām-e-hū suvaidā-e-mujarrad ālam-e-hairat
mirī gum-gashtagī se ab ye naqsha hai jahāñ dil thā

kahāñ zauq-e-tan-āsānī meñ āsānī mayassar thī
talāsh-e-rāhat-e-manzil meñ dil gum-karda manzil thā

dil ḳhatāvār-e-nazar pārsā tasvīr-e-anā
vo bashar hai ki farishta hai ki ḳhudā hai kyā hai

baiThe biThā.e dil ke safar par chale to aa.e
lekin vo mehrbān-e-safar kitnī duur haiñ

ab to khul jā.egā shāyad tirī ulfat kā bharam
ahl-e-dil jur.at-e-iz.hār tak aa pahuñche haiñ

vo shāh-e-husn mere is mulk-e-dil pe yaaro
jis dam ki dauḌne ko yalġhār ghar se niklā

kuchh to asar kiyā hai dil kī tire kashish ne
paḌhtā jo vo 'sulaimān' ash.ār ghar se niklā

vahī ummīdeñ shikast-e-dil kī vahī kahānī
vo jāñ-ba-kaf dostoñ kī qurbāniyāñ kahāñ haiñ