Tags-Dil

ahl-e-junūñ to dil kī sadā par jaan se apnī jā bhī chuke
ahl-e-ḳhirad ab jaane ham ko kyā samjhāne aate haiñ

saarī umr hī dil se apnā aisā kuchh bartāo rahā
jaise khel meñ hārne vaale bachche ko bahlāte haiñ

dekh ye jazb-e-mohabbat kā karishma to nahīñ
kal jo tere dil meñ thā vo aaj mere dil meñ hai

kisī anjān chamak ke haiñ dil-o-chashm asiir
silsila ek sā hai aa.ine se paanī tak

dil thā ehsās-mund pahlū meñ
husn se ijtināb kyā karte

vo jo ik shauq-e-junūñ-sāz kā afsāna hai
aañkh shāyad kahe dil to abhī dīvāna hai

sadiyoñ lahū se dil kī hikāyat likhī ga.ī
merī vafā ga.ī na tirī be-ruḳhī ga.ī

dil de ke us ko chhūT ga.e apne-āp se
is se chhuTe to haath se duniyā chalī ga.ī

vo ye kahtī haiñ magar chīnī kī īñToñ kā agar farsh ho dīvāreñ hoñ
dil ye kahtā hai ki har chiiz kā nikhrā huā rañg

maiñ ne jo taḳhliya meñ kahā hāl-e-dil kabhī
muñh se na kuchh javāb diyā muskurā ga.e

tū hissar-e-dar-o-dīvār liye jaa.e kidhar
merā kyā hai ki maiñ huuñ dasht-ba-dil ḳhāna ba-sar

kis ne dekhā hai mirā shahr-e-ḳhamoshān-e-hayāt
dil kī vaadī se guzarnā hai to āhista guzar

ye hūryān-e-farañgī dil o nazar kā hijāb
bahisht-e-maġhrabiyāñ jalva-hā-e-pā-ba-rikāb

dil o nazar kā safīna sambhāl kar le jā
mah o sitāra haiñ behr-e-vajūd meñ girdāb

dil kī dil ko ḳhabar nahīñ miltī
jab nazar se nazar nahīñ miltī

dil-e-māsūm kī vo pahlī choT
dostoñ se nazar nahīñ miltī

ye jānte haiñ ki dil ḳhaak ho gayā jal kar
na aag dekhī na uThte hue dhuāñ dekhā

din ko jo kuchh tum ne dekhā ye to thī sab dil-lagī
shab ko rah jaao to dikhlā.eñ tamāshā ek aur

dil ko nafrat ho ga.ī nazroñ se āḳhir gir ga.e
tum se behtar apnī ā.ankhoñ meñ samāyā ek aur

pustakoñ meñ umr guzrī baal bhī chāñdī hue
mere ḳhātir dil kā darvāza khulā koī na thā