Tags-Dil

kahtā huuñ ġhalat tujh se maiñ dil ko chhuḌā.ūñgā
chhuTte haiñ kahīñ pyāre bāñdhe hue ulfat ke

dil meñ shagufta gul bhī haiñ raushan charāġh bhī
kyā chiiz haiñ ye soz-e-mohabbat ke daaġh bhī

tadbīr-e-chāra-sāzī-e-dil sochne ke ba.ad
rahtā hai bad-gumāñ mire dil se dimāġh bhī

ham ne to rāz-e-ishq chhupāyā magar 'farīd'
chāragaroñ ne DhūñDh liye dil ke daaġh bhī

hañsī hai dil-lagī hai qahqahe haiñ
tumhārī anjuman kā pūchhnā kyā

bujh gayā dil to ḳhabar kuchh bhī nahīñ
aks-e-ā.īne nazar kuchh bhī nahīñ

bahār kā ruup bhī nigāhoñ meñ ik fareb-e-bahār sā hai
hayāt meñ dilkashī nahīñ hai hayāt meñ intishār sā hai

zamāna kyā dekhiye dikhā.e na jaane kyā inqalāb aa.e
falak ke tevar meñ ḳhashmagīñ se zamīñ ke dil meñ ġhubār sā hai

kuchh aaj aisī hī jī pe guzrī dabī huī thī jo choT ubhrī
jise sambhāle huā thā dil meñ vo naala be-iḳhtiyār sā hai

dil bhī bah jā.egā tire ham-rāh
kārvān-e-sarishk Tuk tham to

kyuuñ rakhūñ daaġh dil par ai 'joshish'
daaġh ko bah kare hai marham to

paap nahīñ hai jis ke dil meñ
chain se sonā jāntā hai

isī ravish pe hai qaa.im mizāj-e-dīda-o-dil
lahū meñ ab bhī taḌaptī haiñ bijliyāñ ki nahīñ

apne silsile se bhī kyā ḳhayāl aa.e haiñ
jaañ kī qadr kuchh nahīñ dil-ba-dast dil-barāñ

dil apnā jalāo shab-e-zulmat ke harīfo
kyā ġham hai charāġhoñ ke agar qaht paḌe haiñ

dil-o-jāñ jo haiñ ye so apne nahīñ
samajhte haiñ in ko to ham aap kā

koī milā to kisī aur kī kamī huī hai
so dil ne be-talabī iḳhtiyār kī huī hai

jahāñ se dil kī taraf zindagī utartī thī
nigāh ab bhī usī baam par jamī huī hai

hamārā ilm to marhūn-e-lauh-e-dil hai miyāñ
kitāb-e-aql to bas taaq par dharī huī hai

ahl-e-junūñ ḳhuub haiñ vāqif-e-ā.īn-e-shauq
dil pe magar iḳhtiyār dekhiye kab tak rahe