Tags-Dil

pareshāñ ho ke dil tark-e-ta.alluq par hai āmāda
mohabbat meñ ye sūrat bhī na raas aa.ī to kyā hogā

ahl-e-tūfāñ aao dil-vāloñ kā afsāna kaheñ
mauj ko gesū bhañvar ko chashm-e-jānāna kaheñ

yār-e-nukta-dāñ kidhar hai phir chaleñ us ke huzūr
zindagī ko dil kaheñ aur dil ko nazrāna kaheñ

pāra-e-dil hai vatan kī sarzamīñ mushkil ye hai
shahr ko vīrān yā is dil ko vīrāna kaheñ

har ġhazal kī mujhe takmīl pe mahsūs huā
dil meñ kahne ko koī baat abhī baaqī hai

khilte haiñ dil meñ phuul tirī yaad ke tufail
ātish-kada to der huī sard ho gayā

uf ye dil hādsoñ se ubhartā nahīñ
kyuuñ ye kambaḳht muqaddar sañvartā nahīñ

terā chehra arġhavānī terā dil-e-be-āb-o-rañg
zindagī kyā hai tirī qānūn se fitrat ke jañg

tere hoñToñ par hañsī hai dil tirā afsurda hai
tū ba-zāhir jī rahī hai ruuh terī murda hai

terā dil hai zañg-ālūda magar chehra hai saaf
tere zāhir aur bātin meñ hai kitnā iḳhtilāf

maiñ dil ke daaġh dikhā.ūñ ki zaḳhm-e-sar un ko
jo pūchhte haiñ ki mafhūm-e-dostī kyā hai

sitāroñ par khule haiñ raaz dil ke
tirī bāteñ hī bas shab-bhar huī haiñ

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

chheḌe koī jo ġham kī baat terā bhī jaa.e dil pe haath
siine meñ dhaḌkanoñ ke saath tiir sā kuchh chubhā kare

tere bhī hoñT jaa.eñ sil tū bhī kabhī ho munfa.il
ruḳh pe baras ke abr-e-dil qissa-e-dil kahā kare

ye dil hai yā kisī āfat-rasīda shahr kī raat
ki jitnā shor thā utnā sukūt taarī hai

muddat se khañDar dil kā bhī vīrān paḌā hai
kuchh der yahīñ ḳhaak uḌā.eñ chalo aao

ab dil kī tamannā hai to ai kaash yahī ho
aañsū kī jagah aañkh se hasrat nikal aa.e

un se kah do ki ilāj-e-dil-e-shaidā na kareñ
yahī achchhā hai ki bīmār ko achchhā na kareñ

āshnā ġham se milā rāhat se begāna milā
dil bhī ham ko ḳhūbī-e-qismat se dīvāna milā