Tags-Dil

ye dil vahī to hai jo tumheñ ab hai nā-pasand
māshūq kar chuke haiñ jise bār-hā pasand

chiḌte haiñ vo savāl se ye ham samajh ga.e
hai is liye unheñ dil be-mudda.ā pasand

rakh deñge ā.īne ke barābar ham apnā dil
yā to ye nā-pasand huā un ko yā pasand

merā hī kyā qusūr ye mujh par sitam hai kyuuñ
āñkhoñ ne dekhā aap ko dil ne kiyā pasand

tū samajhtā hai mujhe harf-e-mukarrar lekin
maiñ sahīfa huuñ tire dil pe utarne vaalā

manzar Thahar gayā hai koī dil meñ aan kar
duniyā ke saath us ko badalnā nahīñ hai ab

lab-āshnā-e-harf-e-tabassum nahīñ rahe
dil ke lahū ko ashk meñ Dhalnā nahīñ hai ab

dil meñ hamāre ab koī armāñ nahīñ rahā
vo ehtimām-e-gardish-e-daurāñ nahīñ rahā

samjhā rahā huuñ yuuñ dil-e-muztar ko hijr meñ
vo kaun hai jo ġham se pareshāñ nahīñ rahā

ashkoñ ke saath saath kuchh armāñ nikal ga.e
bechainiyoñ kā dil meñ vo tūfāñ nahīñ rahā

adāvateñ thiiñ mohabbateñ thiiñ na jaane kitnī hī hasrateñ thiiñ
magar phir aisā huā ki sab kuchh maiñ ḳhud hī dil se nikāl aayā

tamām rañj o mehan ko chhoḌeñ tumhīñ ko dekheñ tumhīñ ko socheñ
baḌe zamāne ke ba.ad dil meñ ye bhūlā bisrā ḳhayāl aayā

vo kah rahe haiñ kaho dil kī baat baat magar
na jaane kyuuñ ka.ī bātoñ ko rok rakkhā hai

iiñT ugtī dekh apne khet meñ
ro paḌā hai aaj dil kisān kā

aatā hai baar baar fareb-e-ḳhulūs meñ
kyā sāda-lauh apnā dil-e-dard-mañd hai

jo iltihāb-e-ātish-e-ġham se hai nāla-kash
vo dil nahīñ chaTaḳhtā huā ik sipand hai

dil bhī aap ko bhuul chukā hai
sāhab aap se parda kyā hai

ab bhī dil ke darvāze par
ek diyā jaltā rahtā hai

duniyā par kyuuñ dosh dhareñ ham
apnā dil bhī kab apnā hai