Tags-Dil

naqsh-e-qadam paḌe haiñ ye qudrat ke jā-ba-jā
duniyā-e-dil se uTh ke bad-aḳhlāq chal paḌe

maiñ bikhar na jā.ūñ varaq varaq mujhe tāq-e-dil meñ sajā.iye
mirā harf harf hai be-bahā mujhe is tarah na miTā.iye

hai ḳhizāñ kī zad pe abhī talak ruḳh-e-'sumbul' dil-e-yāsmīñ
abhī intizār kā vaqt hai abhī jashn-e-gul na manā.iye

dil meñ jhāñkā to bahut zaḳhm purāne nikle
ik fasāne se ka.ī aur fasāne nikle

hamāre dil se uThī hausla-shikan āvāz
magar ye paañv kī zanjīr tak nahīñ pahuñchī

dil ke dar pe haiñ ye donoñ rishta-e-ham-sā.egī
gesū-e-shab-gīr se hai fikr dāman-gīr kā

hasratoñ se is tarah rah rah ke hotī hai ḳhalish
TuuT jaa.e lag ke dil meñ jaise paikāñ tiir kā

ye tirā āstān jalva hai
mere dil kī bhī shaan hai pyāre

tū salāmat rahe tire dam se
dil kī duniyā javān hai pyāre

dil kī betābiyoñ kā haal na pūchh
ek aafat meñ jaan hai pyāre

kisī kī yaad ke lamhe hamāre dil kī taraf
ibādatoñ ke liye sub.h-o-shām aate haiñ

dil ko ai ishq sū-e-zulf-e-siyah-fām na bhej
rahzanoñ meñ tū musāfir ko sar-e-shām na bhej

kare kyā ki dil bhī to majbūr hai
zamīñ saḳht hai āsmāñ duur hai

tamannā-e-dal ke liye jaan dī
salīqa hamārā to mash.hūr hai

dil apnā nihāyat hai nāzuk-mizāj
girā gar ye shīsha to phir chuur hai

kahīñ jo tasallī huā ho ye dil
vahī be-qarārī ba-dastūr hai

na chāñd meñ na shafaq meñ na lāla-o-gul meñ
jo aap meñ hai kahīñ bhī vo dilkashī na milī

hamīñ ko sauñp diye kul jahāñ ke rañj-o-alam
kisī meñ aur hamārī sī dil-dahī na milī

nigāh-e-dost ne baḳhshī jo dil ko mad-hoshī
sharāb-o-jām se ham ko vo be-ḳhudī na milī

jo chheḌtī mire betāb dil ke tāroñ ko
kisī bhī saaz meñ darshan vo naġhmagī na milī