Tags-Dil

dil se majbūr tere dīvāne
ik jagah kab qayām karte haiñ

tirī nigah se ise bhī gumāñ huā ki maiñ huuñ
vagarna dil to mirā māntā na thā ki maiñ huuñ

jise bhulā ke ye dil mutma.in thā muddat se
kal us ke zikr pe ik ahd bol uThā ki maiñ huuñ

ajiib ālam-e-hū thā 'ziyā' jab āḳhir-e-shab
kisī ko dil ne ye kahte hue sunā ki maiñ huuñ

ġhunche kī chaTak dil kī tahoñ meñ na utartī
is meñ jo nahufta tirā paiġhām na hotā

karoḌoñ dil jo mue paḌe haiñ nikalte ḳhūnīñ kafan se nālāñ
qayāmat aa jaatī jo vo qāmat galī meñ apnī ḳhirām kartā

bhalā huā jo naqāb tū ne uThāyā chehre se hai parī-rū
vagarna siine se dil taḌap kar nigah meñ aa kar maqām kartā

dil ko chhūne se jo rahe qāsir
vo bhī 'qaisar' hai shā.irī koī

kahe hai yuuñ dil-e-muztar se us bin jān-e-ġham-dīda
chalo tum rafta rafta aate haiñ pīchhe tumhāre ham

na maanī dil ne apnī aur na ham ne baat nāseh kī
hameñ kah kah ke haarā vo use kah ke haare ham

bahār naam hai tahzīb-e-mausam-e-dil kā
avaam mausam-e-gul ko bahār kahte haiñ

butān-e-mah-vish ujḌī huī manzil meñ rahte haiñ
ki jis kī jaan jaatī hai usī ke dil meñ rahte haiñ

hazāroñ daaġh pinhāñ āshiqoñ ke dil meñ rahte haiñ
sharar patthar kī sūrat un kī āb-o-gil meñ rahte haiñ

hazāroñ hasrateñ vo haiñ ki roke se nahīñ ruktīñ
bahut armān aise haiñ ki dil ke dil meñ rahte haiñ

ḳhudā rakkhe mohabbat ne kiye ābād donoñ ghar
maiñ un ke dil meñ rahtā huuñ vo mere dil meñ rahte haiñ

surāġh-e-mehr-o-ulfat ġhair ke dil meñ na pā.eñge
abas vo raat din is sa.ī-e-be-hāsil meñ rahte haiñ

butoñ ko mahram-e-asrār tū ne kyuuñ kiyā yā rab
ki ye kāfir har ik ḳhalvat-sarā-e-dil meñ rahte haiñ

tan-āsānī kahāñ taqdīr meñ ham dil-giraftoñ kī
ḳhudā par ḳhuub raushan hai ki jis mushkil meñ rahte haiñ

ḳhudā rakkhe dil-e-īzā-talab ko
zabāñ chaltī rahegī nashtaroñ kī

vo ek aam sā lahja thā bhīge mausam kā
nigāh-o-dil meñ magar yuuñ utar gayā thā ki bas