Tags-Dil

shoḳhī-e-naqsh koī hādsa-e-vaqt nahīñ
mo.ajaza-e-kārī-e-ḳhūn-e-dil-e-fankār to dekh

dil to bahut liye haiñ tum ne har ek jā se
is mere dil kā sāhab kuchh imtiyāz karnā

koī ruktā hī nahīñ is kī tasallī ke liye
dekhtā rahtā hai dil har ajnabī mehmān ko

ab to ye shāyad kisī bhī kaam aa saktā nahīñ
aap hī le jā.iye mere dil-e-nādān ko

kis tarah apnī ḳhāna-ḳharābī ayaañ kare
vo dil jo parde vāloñ kā kāshāna ho gayā

jis ko shaġhl-e-nafī-o-isbāt hai
vo hī sāhib-dil hai ḳhush-auqāt hai

kyā yaar kī bad-ḳhūī kyā ġhair kī bad-ḳhvāhī
sarmāya-e-sad-āfat hai dil hī kā aa jaanā

hai haq ba-taraf us ke chāhe sau sitam kar le
us ne dil-e-āshiq ko majbūr-e-vafā jaanā

'majrūh' hue maa.il kis āfat-e-daurāñ par
ai hazrat-e-man tum ne dil bhī na lagā jaanā

tirī yaad jo mere dil meñ hai bas usī kī jalvagarī rahī
mirā ġham bhī tāza-ba-tāza hai mirī shāḳh-e-fan bhī harī rahī

kabhī 'anjum' vo bhī din aa ga.e ki ḳhushī kī bazm sajā.eñge
ye tamannā jo mere dil meñ thī vo yūñhī dharī kī dharī rahī

darūn-e-dil hī rakkho vaañ hifāzat meñ rahegā
vo ik rāz-e-nahufta jo chhupānā bhī nahīñ hai

sameTā jaa.e sad-pāra jigar yaaro ki ham ne
tamāshā-e-dil-e-ḳhasta manānā bhī nahīñ hai

naġhma-e-nau ke vāste ġhair kī ehtiyāj kyā
chheḌ de tār-e-sāz-e-dil chañg-o-rubāb kuchh nahīñ

hameñ dil chāhiye thā us ko daulat
hamāre paas daulat hī nahīñ thī

jo tujhe chāhā batānā na batāyā phir bhī
kab chhupā hāl-e-dil-e-soḳhta nāma-bar se

dī sadā dil ne zarā aur bhī dushvār ho raah
rāste jab bhī mire sāmne hamvār aa.e

aql kā hukm ki sāhil se lagā do kashtī
dil kā isrār ki tūfāñ se laḌā dī jaa.e

duur tak dil meñ dikhā.ī nahīñ detā koī
aise vīrāne meñ ab kis ko sadā dī jaa.e

ye visāl-o-hijr kī bahs kyā ki ajiib chiiz hai ishq bhī
tujhe pā ke hai vahī dard-e-dil vahī rañg-e-zaḳhm-e-jigar bhī hai