Tags-Dil

ek to marzī na thī jaane ko merī us taraf
tis pe dil āñkhoñ se bārāñ ḳhuuñ kā barsātā rahā

shaguftagī se ga.e, dil-giraftagī se ga.e
ham aaj ḳhalvat-e-jāñ meñ bhī be-dilī se ga.e

samajhte kyuuñ nahīñ ye shā.er-e-karaḳht-navā
suḳhan kahāñ kā jo lahje kī dilkashī se ga.e

go tarastā hai abhī tak tirī tahrīr ko dil
phir bhī jaane tirī tasvīr kahāñ se aa.ī

ġhazal ke dil-rubā lahje kī shoḳhī
suḳhan kā silsila detī hai ab bhī

dil ne kahā ki shām-e-shab-e-vasl se na bhaag
ab pak chukī hai fasl kaTā.ī kā vaqt hai

de ke bū zulf kī rakh lo tah-mahram dil ko
ḳhvāb meñ phir na Daroge ye hai Dar kā ta.avīz

dil hai ab maañg ke āġhosh meñ din-rāt 'riyāz'
ye to sar chaḌh ke banā yaar ke sar kā ta.avīz

vo jo be-qarāri-e-jān-o-dil thī nahīñ rahī
vo jo hijr terā muhāl thā so nahīñ rahā

bas tū ne apne muñh se jo parda uThā diyā
hasrat nikal ga.ī dil-e-ummīd-vār kī

ḳhayāl meñ ik na ik maze kī na.ī kahānī hai aur ham haiñ
abhī tamannā hai aur dil hai abhī javānī hai aur ham haiñ

jatā chuke dard-e-dil ko apne jo ab jatā.eñ to kyā jatā.eñ
kahī huī bhī sunī huī bhī vahī kahānī hai aur ham haiñ

ban ga.e ḳhuub hadaf us sitam-ījād ke aap
lījiye hazrat-e-dil aaj to armāñ niklā

sāf-dil bahr-e-jahāñ meñ nahīñ rakhte daulat
chashma-e-mahr se kab gauhar-e-ġhaltāñ niklā

mere marne se hue saikḌoñ armān shahīd
'ālim' anjām meñ dil ganj-e-shahīdāñ niklā

maiñ haath mal rahī huuñ 'humā' us se ruuTh kar
dil meñ sahī use bhī to pachhtānā chāhiye

rahegā jaan ke ham-rāh dil kā soz-o-gudāz
chitā se aa.egī marne ke ba.ad ye āvāz

ye hujūm-e-ġham-e-daurāñ meñ kahāñ yaad rahā
dāstān-e-ġham-e-dil tere taġhāful se kahūñ

kyā ḳhabar ḳhema-e-lailā ke nigahbānoñ ko
ki harīm-e-dil-e-lailā meñ hai mehmān-e-junūñ

ab tire haal pe tujh ko dil-e-nādāñ chhoḌā
sochnā bhī to qayāmat hai kahāñ tak sochūñ