Tags-Dil

vahī hai kāmil 'nazīr' is jā vahī hai raushan-dil ai azīzo
havā se duniyā kī jis ke dil kā na hove hargiz charāġh ThanDā

dil to saada hai terī har baat ko sachchā māntā hai
aql ne bāteñ karte terā aañkh churānā dekhā hai

chāhā thā mafar dil ne magar zulf-e-girah-gīr
pechāk banātī rahī pechāk se bāhar

bahār-e-dāġh thī jab dil pe 'qā.em'
ajab sarsabz thā gulshan hamārā

dil taḌaptā hai paḌā is sīna-e-sad-chāk meñ
khol kar band-e-qabā tū ai saman-bar ham se mil

ye nīm-bāz tirī añkhḌiyoñ ke maiḳhāne
nazar mile to chhalak jaa.eñ dil ke paimāne

kuchh nahīñ ma.alūm hotā dil kī uljhan kā sabab
kis ko dekhā thā ilāhī baal suljhāte hue

dasht-e-vafā meñ jal ke na rah jaa.eñ apne dil
vo dhuup hai ki rañg haiñ kaale paḌe hue

naaz parastish ban jā.egā sabr zarā ai shorish-e-dil
ulfat kī dīvāna-garī se husn abhī begāna hai

yuuñ hai us kī bazm-e-tarab meñ ik dil ġham-dīda jaise
chāroñ jānib rañg-mahal haiñ beach meñ ik vīrāna hai

ab aur kyā ho tamannā-e-vasl kā anjām
dil o dimāġh tirī yaad ho ke rah ga.e haiñ

kisī kī yaad diloñ kā qarār Thahrī hai
kisī ke zikr se dil shaad ho ke rah ga.e haiñ

hai bā.is-e-jam.iyyat-e-dil ek jahāñ kī
ai shoḳh pareshāni-e-kākul kī ishārat

yaad aa.e tirī zulf na mujh ko jo chaman meñ
de taab mire dil ko na sumbul kī ishārat

'mohsin'-ehsān mashaqqat kī bhī had hotī hai
tum to mar jāoge bār-e-ġham-e-dil-dār ke saath

kahā maiñ ne baat vo koThe kī mire dil se saaf utar ga.ī
to kahā ki jaane mirī balā tumheñ yaad ho ki na yaad ho

mire ghar tak bhī aa pahuñchā hai āḳhir shor galiyoñ kā
ye tanhā.ī mire dil se judā hone hī vaalī hai

dil ke mandar meñ ḳhushbū hai lobān kii, ghanTiyāñ baj uThīñ, dev-dāsī thī vo
kitne sarkash añdheroñ meñ jaltī rahī dekhne meñ to mash.al zarā sī thī vo

hamārā ḳhirman-e-dil bhī to jal chukā yārab
giregī ab kahāñ barq-e-tapāñ nahīñ ma.alūm

dil-e-'umīd' bhī thā jis ke saath saath ravāñ
kahāñ pe luT gayā vo kārvāñ nahīñ ma.alūm