Tags-Diwangi

kab kā guzar chukā hai dīvāngī kā aalam
phir bhī 'majāz' apnā dāman rafū kare hai

ba-juz dīvāngī hotā na anjām-e-ḳhud-ārā.ī
agar paidā na kartā aa.ina zanjīr jauhar kī

kahte haiñ zāhid mirī dīvāngī ko dekh kar
but-parastī ke sabab qahr-e-ḳhudā nāzil huā

us ke sheroñ meñ mohabbat ke sivā kuchh bhī na thā
par 'alīnā' ko yahī dīvāngī achchhī lagī

ye jo tūfān tire gird hai dīvāngī kā
ik zarā tez huā aur bikhar jā.egā tū

ab ke aa.ī bhī aur ga.ī bhī bahār
fasl-e-dīvāngī nahīñ aa.ī

nikohish māne-e-dīvāngī-hā-e-junūñ aa.ī
lagāyā ḳhanda-e-nāseh ne baḳhiya jeb-o-dāman meñ

aql meñ yuuñ to nahīñ koī kamī
ik zarā dīvāngī darkār hai

merī is dīvāngī kī apnī ik raftār hai
ishq meñ har aadmī kī apnī ik raftār hai

phir vahī shorish vahī josh-o-ḳharosh
phir kahīñ dīvāngī taarī na ho ai dil ḳhamosh

dīvāngī kī raah meñ gum-sum huā na thaa!
duniyā meñ apnā koī kahīñ āshnā na thaa!

kisī ke ruḳh se jo parda uThā diyā maiñ ne
sazā ye paa.ī kī dīvāngī kī qaid meñ huuñ

dīvāngī kā silsila jaave na haath se
dāman ko phāḌiye jo garebāñ rafū kareñ

ai zabt-e-dil ye kaisī qayāmat guzar ga.ī
dīvāngī meñ chaak garebān ho gayā

kamāl-e-dīvāngī to jab hai rahe na ehsās-e-jaib-o-dāman
agar hai ehsās-e-jaib-o-dāman to phir junūñ hoshiyār sā hai

ishq kī rāhoñ meñ haa.el ho rahī hai āgahī
ab junūñ baḌh jā.egā dīvāngī baḌh jā.egī

ḳhirad-navāz nigāhoñ kī aaḌ meñ rah kar
fazā-e-ālam-e-dīvāngī pe chhā.e jā

phir sabā meñ hai na.ī dīvāngī
kyā mizāj-e-zulf phir barham huā

ham jo dīvāngī meñ kar guzre
aql vaale vo hunar kyā karte

rāh-e-sahrā hai na aatī hai kahīñ fasl-e-bahār
ishq meñ dīvāngī jāma-darī kyā dekhnā