Tags-Dua

māñge hue sūraj se to behtar hai añdherā
tū mere liye apne ḳhudā se na duā kar

āñkheñ mirī raushan raheñ ḳhush-hāl rahūñ maiñ
ik andhī bhikāran kī mire haq meñ duā hai

kabhī dair meñ the kisī but pe fidā kabhī ka.abe meñ karte jā ke duā
tire kūche meñ baiThe to ḳhuub huā ki kashākash-e-dair-o-haram se chhuTe

dosto sun lī ḳhudā ne kal mirī pahlī duā
sharm se āḳhir jhukānī paḌ ga.ī gardan mujhe

jis vaqt ki vo haath chhuḌāne pe ba-zid thā
us vaqt koī yaad duā hī nahīñ aa.ī

tum sadā achchhī raho 'āzar' kī hai bas ye duā
fāsle sadiyoñ ke haiñ ab darmiyāñ achchhī to ho

duniyā ke kār-zār meñ bachchoñ ko maaoñ ne
ruḳhsat kiyā hai harf-e-duā ke baġhair bhī

yā-rab ġham-e-hijrāñ meñ itnā to kiyā hotā
jo haath jigar par hai vo dast-e-duā hotā

ūl-julūl bak gayā tujh ko tirā ye dil-jalā
rab se magar hai ye duā kuchh na tirā burā kare

mere lab par koī duā hī nahīñ
is karam kī kuchh intihā hī nahīñ

mere hāthoñ hī ne ā.īna dikhāyā thā mujhe
kitne mushkil the taqāze jo duā meñ aa.e

kal jo tū ghar se na niklā uTh gayā kar ke duā
sub.h se tā-shām maiñ kyā intizārī khīñch kar

kar rahā huuñ duā ki dard baḌhe
fikr kartā huuñ roz marham kī

kal duā ne ye mujh se pūchhā thā
kyā tumheñ bad-duā bhī aatī hai

mujh ko supurd-e-ḳhāk karo is duā ke saath
āñgan meñ phuul khilte raheñ aur makāñ rahe

itne be-parvā irāde itne be-taufīq ġham
haath uThte haiñ magar harf-e-duā miltā nahīñ

yaqīn hai ki kabhī be-asar nahīñ hogī
duā laboñ pe machalne ke baad aa.ī hai

har-dam ye duā māñgte rahte haiñ ḳhudā se
allāh bachā.e shab-e-furqat kī balā se

duā kī raakh pe marmar kā itr-dāñ us kā
gazīdgī ke liye dast-e-mehrbāñ us kā

shaam hote hī ghar mujh se chhoTā paḌ jaatā hai
maiñ rastoñ kī bad-duā par niklā huuñ