Tags-Dua

jāgtī āñkhoñ se vābasta diyā māñge hai
vaqt-e-ummīd basārat kī duā māñge hai

kis kis duā ko māñgeñ kyā kyā havas nikāleñ
ik jaañ kidhar kidhar ho ik dil kahāñ kahāñ ho

khaḌā huuñ zer-e-falak gumbad-e-sadā meñ 'munīr'
ki jaise haath uThā ho koī duā ke liye

maraz shifā kī taḌap meñ qadam uThātā hai
kabhī davā kī taraf aur kabhī duā kī taraf

qismat hai saath agar to duā bhī hai pur-asar
varna kiye haiñ ham ne bhī sajde kahāñ kahāñ

bhar diyā zaḳhm meñ namak us ne
ye duā-go kī muñh-bharā.ī hai

maiñ jab bhī dhuup ke sahrā meñ jā nikaltā huuñ
vo haath mujh pe duā kā shajar banāte haiñ

yuuñ apnī duā sun ke chahak uTThe farishte
jis tarah suḳhan-fahm koī misra.a uThā.eñ

ye iltijā duā ye tamannā fuzūl hai
sūkhī nadī ke paas samundar na jā.egā

maiñ baḌhā.uñgā tirī shohrat-e-ḳhush-bū kā nikhār
tū duā de mire afsāna-e-rusvā.ī ko

'sīmāb' duā kījiye kyā sabr-o-sukūñ kī
shā.ista-e-taskīñ dil-e-ġhamnāk nahīñ hai

havā kā rañg Dhañg hī kuchh aur hai
duā karo ki āshiyāñ kī ḳhair ho

ye jazb-o-kaif yuuñ hī mustaqil raheñ
duā hai dil ke āstāñ kī ḳhair ho

uThe jo haath duā ko badal ga.e manzar
ḳhudā se merā yaqīñ ham-kalām hai shāyad

phūloñ kā dil kalī kī tamannā mirī duā
kaam aa.e rañg ban ke tumhāre jamāl meñ

insāniyat hai marg-e-musalsal se ham-kanār
māñgo duā hayāt rahe ġham se sarfarāz

koī dard ho to davā karūñ na bane davā to duā karūñ
use kyā kahūñ use kyā karūñ ki maiñ un ke dil se utar gayā

pukārte pukārte sadā hī aur ho ga.ī
qubūl hote hote har duā hī aur ho ga.ī

vo kārgar ho duā kyā bhalā shifā ke liye
na jab duā meñ ho DhūñDe asar davā ke liye

abr baraste to ināyat us kī
shāḳh to sirf duā kartī hai