Tags-Dua

diye jalā.e hue saath saath rahtī hai
tumhārī yaad tumhārī duā hamāre liye

vo jis pe raat sitāre liye utartī hai
vo ek shaḳhs duā hī duā hamāre liye

un marīzān-e-mohabbat kī davā hai na duā
kar diyā jin pe karam terī masīhā.ī ne

vo dil hī kyā tire milne kī jo duā na kare
maiñ tujh ko bhuul ke zinda rahūñ ḳhudā na kare

do āñkheñ ab bhī dekhtī haiñ rāsta tirā
jā kar kabhī salām duā kah liyā karo

hans hans ke mujhe aap abas kos rahe haiñ
ro ro ke mire vāste māñgeñge duā aap

gar ḳhaak se hamārī putlā koī banāve
terī duā meñ us kī uTThī kalā.iyāñ hoñ

vo ārifān-e-sabaq kahāñ ab jo dil baḌhā.eñ
maiñ sach likhūñ harf kī duā luuñ yahī bahut hai

gunāhgār sahī tālib-e-karam to hai
'sahar' ke haq meñ tū dast-e-duā uThā ke pilā

zāhid burā na māneñge is bad-duā se ham
hoñ but-parast chāhte haiñ ye ḳhudā se ham

tū ḳhud ko bad-duā detā hai aksar
ḳhudā ke ghar samā.at ho ga.ī to

duā lab-e-jām ne bhī māñgī subū ne bhī haath uThā uThā kar
hamārī mahfil meñ aayā saaqī ḳhudā ḳhudā kar ḳhudā ḳhudā kar

husn jab mehrbāñ ho to kyā kījiye
ishq ke maġhfirat kī duā kījiye

davā hai mere liye jis kī ḳhāk-e-pā 'mohsin'
usī kā ism hai harf-e-duā bhī mere liye

faqīrāna aa.e sadā kar chale
ki myaañ ḳhush raho ham duā kar chale

mumkin hai bhalā kaise ilāj-e-ġham-e-jānāñ
jab koī davā yaad na hai koī duā yaad

tirī sāzishoñ se hī jugnū mare
mirī bad-duā hai ki ab tū mare

ḳhulūs ho to duā meñ asar bhī aatā hai
shajar harā ho to us meñ samar bhī aatā hai

jis sahar kī ham ne māñgī thī asīrī meñ duā
vo sahar aa.ī to lekin shaam ho kar rah ga.ī

hai vo maqtūl kāfir-e-nemat
apne qātil ko jo duā na kare