Tags-Dua

alif se naam tirā tere naam se maiñ alif
ilāhī merā har ik dard is duā meñ hai

vo kyā din the yahīñ ham ne bahāroñ kī duā kī thī kisī ne bhī nahīñ sochā
chaman vāloñ ne mil kar jab ḳhud apnā hī chaman luuTā ḳhizāñ ke āḳhirī din the

us ke lab par ik duā hai sirf merī maut kī
mere lab par kuchh nahīñ kuchh bhī nahīñ āmīn hai

maiñ kisī ke dast-e-talab meñ huuñ to kisī ke harf-e-duā meñ huuñ
maiñ nasīb huuñ kisī aur kā mujhe māñgtā koī aur hai

maiñ ab marūñ ki jiyūñ mujh ko ye ḳhushī hai bahut
use sukūñ to milā mujh ko bad-duā de kar

qurbān huī jaatī thiiñ rahmat kī ghaTā.eñ
in kāñpte hoñToñ kā hai andāz-e-duā yaad

ye jo apne ḳhudā se Darte haiñ
ham kisī bad-duā se Darte haiñ

paḌī jo nazar chāñd par daf.atan
mire lab pe aa.ī duā ḳhūbsūrat

aa.e haiñ sunte ki aisā vaqt bhī aatā hai jab
ho davā yā phir duā kuchh kārgar hotā nahīñ

mere liye to harf-e-duā ho gayā vo shaḳhs
saare dukhoñ kī jaise davā ho gayā vo shaḳhs

tū mere saath hathelī uThā nikal aa.e
koī duā na sahī bad-duā nikal aa.e

usī ko matlabī 'tābāñ' kahā zamāne ne
duā salām jo chhoTe baḌe se rakhtā thā

thā usī bhiiḌ meñ vo merā shanāsā thā bahut
jo mujhe mujh se bichhaḌne kī duā detā thā

buland hāthoñ meñ zanjīr Daal dete haiñ
ajiib rasm chalī hai duā na māñge koī

hai ḳhulāsa mirī zindagī kā yahī
ek nākām harf-e-duā aur maiñ

haa.e us vaqt ko kosūñ ki duā duuñ yaaro
jis ne har dard mirā chhīn liyā hai mujh se

aur baaqī bachā hai kyā 'fārūq'
tujh ko māñgā jo duā meñ apnī

maiñ kyā karūñ mire qātil na chāhne par bhī
tire liye mire dil se duā nikaltī hai

na to ḳhauf roz-e-jazā kā ho vahī ishq hai
na malāl radd-e-duā kā ho vahī ishq hai

ik karb-e-musalsal kī sazā deñ to kise deñ
maqtal meñ haiñ jiine kī duā deñ to kise deñ