Tags-Dua

javānī kī duā laḌkoñ ko nā-haq log dete haiñ
yahī laḌke miTāte haiñ javānī ko javāñ ho kar

ranj-o-ġham kī vo ravānī na rahī dil meñ mire
dil dukhegā to batā dil se duā kaise kareñ

ye imtiyāz zarūrī hai ab ibādat meñ
vahī duā jo nazar kar rahī hai lab bhī kareñ

kaash mujh ko koī batā.e 'adam'
kis parī-vash kī bad-duā huuñ maiñ

kī 'munavār' ne duā jo bhī vo nākām rahī
ajr meñ qahr-e-ilāhī ke sivā kuchh na milā

ye duā ka.aba meñ karte haiñ ki us but se milā
tere darvāza par aa kar ai ḳhudā baiThe haiñ ham

kotāh hai nihāyat dast-e-duā hamārā
dāman asar kā jā kar ik baar chhū na aayā

kabhī to mehrbāñ ho kar bulā leñ
ye mahvash ham faqīroñ kī duā leñ

us ne taufīq-e-duā baḳhshī hai
ab duāoñ meñ asar bhī aa.e

yahī bas 'akbar' kī iltijā hai janāb-e-bārī meñ ye duā hai
ulūm-o-hikmat kā dars un ko professor deñ samajh ḳhudā de

dast-e-duā ko kāsa-e-sā.il samajhte ho
tum dost ho to kyuuñ nahīñ mushkil samajhte ho

maiñ ne māñgī thī ye masjidoñ meñ duā maiñ jise chāhtā huuñ vo mujh ko mile
jo mirā farz thā maiñ ne puurā kiyā ab ḳhudā bhuul jaa.e to maiñ kyā karūñ

har duā hogī be-asar na samajh
aaj nāhaq hai aañkh tar na samajh

muusā kā haal dekh ke dil kāñpne lagā
ab to duā hai un se mirā sāmnā na ho

maanā mirī qubūl nahīñ hai duā na ho
itnā hī ho ki us pe asar ġhair kā na ho

chalo ab kisī kī duā mil ga.ī
mire paas vaise bhī thā kuchh nahīñ

ḳhudā ne zahr kī tāsīr baḳhsh dī 'fānī'
taras ga.ī thī asar ko bahut duā merī

Daro na tum ki na sun le kahīñ ḳhudā merī
ki rū-shanās-e-ijābat nahīñ duā merī

tanhā tumhīñ ho jin kī mohabbat kā aasrā
un bekasoñ ke dil kī duā ho ga.e ho tum

ḳhuun meñ in ke shakar hai shukr karte haiñ magar
ye duā dete haiñ 'insulin' ko shaam o sahar