Tags-Dua

jhuum ke jab rindoñ ne pilā dī
shaiḳh ne chupke chupke duā dī

karte haiñ yuuñ duā ki ham goyā
haath asar se uThā.e baiThe haiñ

raat bhar māñgī duā un ke na jaane kī 'qamar'
sub.h kā taara magar le kar payām aa hī gayā

kyā kyā duā.eñ māñgte haiñ sab magar 'asar'
apnī yahī duā hai koī mudda.ā na ho

vo ho aur maiñ huuñ aur koī na ho ġhair
yahī har-dam duā hai aur maiñ huuñ

ḳhayāl-e-gardish-e-daurāñ ho kyā use ki jo shaḳhs
girah meñ maañ kī duā bāñdh kar nikaltā hai

diloñ se dard duā se asar nikaltā hai
ye kis bahisht kī jānib bashar nikaltā hai

sūfī-e-shahr mire haq meñ duā kyā kartā
ḳhud thā muhtāj-e-atā mujh ko atā kyā kartā

merī talab thā ek shaḳhs vo jo nahīñ milā to phir
haath duā se yuuñ girā bhuul gayā savāl bhī

har vaqt mere lab pe rahī hai yahī duā
mil jaa.e vo ki jis kā mirā dil murīd hai

tumheñ hai sāhib lihāz kis kā ye kosnā chupke chupke kaisā
duā karūñ maiñ ragaḌ ke māthā kaho tum āmīn uThā ke āñchal

jis bazm meñ jaatā huuñ mujhe miltī hai izzat
vo yuuñ ki mirī maañ kī duā hai mire pīchhe

vo is lutf se gāliyāñ de ga.e haiñ
kiyā karte haiñ ham duā baiThe baiThe

raas aatī hai bahut āb-o-havā sahrā kī
jaane de dī hai tujhe kis ne duā sahrā kī

na aayā ek din bhī vo but-e-be-rahm ai 'jauhar'
uThā kar haath ka.abe kī taraf māñgī duā barsoñ

vahīñ par le chalī be-tābi-e-dil vāh-rī qismat
phirā kī sar paTaktī jis jagah merī duā barsoñ

hotī nahīñ qubūl duā tark-e-ishq kī
dil chāhtā na ho to zabāñ meñ asar kahāñ

zulm jin dostoñ ne Dhaa.e haiñ
dil ne un ke liye duā kī hai

phir yuuñ hī mil baiTheñ ham aur dukh bharī bāteñ kareñ
haath uThā kar ye duā māñgo munājāteñ karo

kisī pyāsī nadī kī bad-duā huuñ
samundar thā magar sahrā huā huuñ