Tags-Dua

'sābir' vo kam-nasīb huuñ hijr meñ gar uThā.ūñ haath
bāb-e-qubūl se rahe merī duā alag alag

kabhī ḳhayāl meñ socho vo raat kā chehra
ki jis ghaḌī vo duā kartī hai sahar nikle

hai duā yaad magar harf-e-duā yaad nahīñ
mere naġhmāt ko andāz-e-navā yaad nahīñ

de hī dete haiñ kisī tarah tasallī 'sīmāb'
ḳhush raheñ vo jo mire dil kī duā lete haiñ

chāhe jannat na mile chāhe ḳhudā.ī na mile
hai duā merī yahī tujh se judā.ī na mile

uThte nahīñ haiñ ab to duā ke liye bhī haath
kis darja nā-umīd haiñ parvardigār se

zabāñ pe shikva-e-be-mehrī-e-ḳhudā kyuuñ hai?
duā to māñgiye 'ātish' kabhī duā kī tarah

rāt-bhar āyateñ gaate rahiye
kyā ḳhabar koī duā raqs meñ ho

muñh se duā nikal hī ga.ī vaqt-e-qatl bhī
kahnā ye thā ki haqq-e-mohabbat adā huā

naḳhl-e-duā kabhī jab dil kī zamīñ se nikle
saa.e bhī kuchh gumāñ ke barg-e-yaqīñ se nikle

ab aisī hairat-o-vāraftagī ko kyā kahiye
duā ko haath uThā.e uThā ke bhuul gayā

duā kā shāmiyāna bhī nahīñ hai ab to sar par
so ḳhud ko hiddat-e-ġham meñ jhulastā dekhnā hai

ai ḳhudā ajab hai tirā jahāñ mirā dil yahāñ pe lagā nahīñ
jahāñ koī ahl-e-vafā nahīñ kisī lab pe harf-e-duā nahīñ

jin ko rahī sadā mire marne kī aarzū
jiine kī de rahe haiñ vahī ab duā mujhe

tamām shahr hī terī adā se qaa.em hai
husūl-e-kār-gah-e-ġham duā se qaa.em hai

mujh par jo vo sahar se is darja mehrbāñ haiñ
shab kī duā huī hai kuchh mustajāb shāyad

az dil-e-har-dard-mandī josh-e-betābī zadan
ai hama be-mudda.āī yak duā ho jā.iye

bichhā huā thā nigāhoñ meñ farsh-e-istisqā
zamīn-e-dil pe nabī kī duā nikal aa.ī

umr bhar buḳhl kā ehsās rulā.egā tumheñ
maiñ to saa.il huuñ duā de ke chalā jā.ūñgā

mere dāman meñ agar kuchh na rahegā baaqī
aglī nasloñ ko duā de ke chalā jā.ūñgā