Tags-Dua

nuzūl-e-mausam-e-tahqīr-e-jāñ se bachne kī
gulāb aise badan ne duā nahīñ māñgī

tan-e-nahīf kī ḳhātir ridā nahīñ māñgī
bahut dinoñ se ḳhudā se duā nahīñ māñgī

tazabzub ke aalam meñ sochā kiye
duā māñgnā yā davā māñgnā

munāsib nahīñ aasrā māñgnā
duā māñgnā bhī to kyā māñgnā

hamārā hashr to jo kuchh huā huā lekin
duā ye hai ki tirī āqibat sañvar jaa.e

ḳhudā se āḳhirī rishta bhī kaT na jaa.e kahīñ
ki ab ke hai mirā dast-e-duā nishāne par

dast-gīrī jo hai bande kī ḳhudā ko manzūr
uThte haiñ dast-e-duā 'arsh' duā se pahle

ham ne kaasa hī baḌhāyā hai duā dete hue
dar-ba-dar jā ke shikāyat to nahīñ kī ga.ī hai

uThe the haath duā ke liye ki raat kaTe
duā meñ aisā bhī kyā thā ki raat biit ga.ī

munhasir marne pe ho jab sūrat-e-taskīn-e-dil
kosnā maiñ is ko samjhūñ jo duā dene lage

mai-kade meñ ham se mastoñ kī ḳhushī kyā rañj kyā
mil ga.e do-chār sāġhar aur duā dene lage

dushmanī kā koī pairāya-e-nādir DhūñDo
jab bhī aao mujhe jiine kī duā de jaao

ḳhudā se use maañg kar dekhte haiñ
phir apnī duā kā asar dekhte haiñ

kyā kījiye darmān-e-marīz-e-ġham-e-ulfat
jab koī davā aur duā kaam na aa.e

us ke aane kī duā hotī hai din bhar lekin
dar pe dastak mire detā hai asar shaam ke ba.ad

puujā kareñ magar na duā ko uThā.eñ haath
shahr-e-havas meñ ma.abad-e-arbāb hī na ho

maiñ jabr huuñ to jabr kī tā.īd band ho
maiñ sabr huuñ to mujh ko duā denī chāhiye

jhulas rahā hai zamīñ kā siina kiran kiran se duā karo tum
trāvatoñ kī do buuñd le kar yahāñ bhī barse sahāb baabā

duā paḌh kar mirī maañ jab mire siine pe dam kartī
aqīdat ke añdheroñ meñ charāġhāñ hone lagtā thā

duā ke haath meñ ḳhanjar baḌā ajiib lagā
badalte vaqt kā manzar baḌā ajiib lagā