Tags-Dua

ai ahl-e-shahr maiñ to duā-go-e-shahr huuñ
lab par mire duā hai asar kis ke paas hai

merī rusvā.iyoñ pe na ḳhush ho merī dīvāngī ko duā do
tum ko jitnī bhī shohrat milegī sirf merī badaulat milegī

mirī sharāb kī kyā qadr tujh ko ai vaa.iz
jise maiñ pī ke duā duuñ vo jannatī ho jaa.e

lab pe aatii hai du.aa ban ke tamannaa merii
zindagii sham.a kii suurat ho KHudaayaa merii!

ek naam paḌheñ yuuñ donoñ aur duā yuuñ māñgeñ
yā sajde se sar na uTheñ yā lafz asar ho jaa.eñ

naam hoñToñ pe tirā aa.e to rāhat sī mile
tū tasallī hai dilāsa hai duā hai kyā hai

hai duā hoñToñ pe aur haiñ ḳhvāhisheñ hāthoñ ke biich
kaam duniyā ke nikalte haiñ munājātoñ ke biich

basar honā bahut dushvār sā hai
ye shab jaise kisī kī bad-duā hai

mujh ko har raah ujāloñ se bharī miltī hai
ye un āñkhoñ ke charāġhoñ kī duā hai shāyad

bad-duā apne liye ḳhuub karī thī maiñ ne
haañ magar raah meñ haa.il jo duā thī terī

hārtā kyoñ 'ḳhalīl' maañ ne jab
chuum kar kal jabīñ duā dī hai

adhūre lafz the āvāz ġhair-vāzeh thī
duā ko phir bhī nahīñ der kuchh asar meñ lagī

āḳhir suḳhan tamām kiyā is duā ke saath
rahnā guloñ ke beach mahaknā havā ke saath

vahī māyūsī kā aalam vahī naumīdī kā rañg
zindagī bhī kisī muflis kī duā ho jaise

kaise uThā.e haath ab apne duā meñ 'tānī'
sajda qubūl pahle kā jab huā nahīñ thā

miTTī ke ik diye kī mujhe bad-duā lagī
lau de ke ek baar maiñ miTTī kā ho gayā

mere lab par kabhī tū ban ke duā bhī aa.ī
tujhe ai aah mirī baat banā bhī aa.ī

sīnoñ meñ iztirāb hai girya havā meñ hai
kyā vaqt hai ki shor machā hai duā duā

ham be-dar be-ghar logoñ kī ek duā bas ek duā
mālik shahr-e-gulāb salāmat ham par jo bhī aa.e azaab

kyā miTe ummīd-e-tāsīr-e-duā kā iztirāb
dil hai shān-e-rahmat-e-bārī kā dīvānā hanūz