Tags-Duniya

nahīñ hai amn kā duniyā meñ ab maqām koī
ḳhudā ḳhudā kahe koī ki raam raam koī

jo bul-havas haiñ phir aate haiñ tere kūche meñ
jo be-ġharaz haiñ vo duniyā bhī chhoḌ jaate haiñ

tishnagī baañT ke har qaum kā rahbar ye kahe
saarī duniyā meñ to bahtā hai hamārā paanī

jo duniyā tujh se vāqif hī nahīñ hai
maiñ us duniyā kā bāshinda nahīñ huuñ

kisī par mehrbāñ hotī hai jab bhī daulat-e-duniyā
use sāhab use qibla use kyā kyā banātī hai

ye achchhā.ī meñ bhī 'sābir' burā.ī DhūñD letī hai
ye duniyā hai alif par bhī kabhī shosha banātī hai

be-dilī haa.e tamannā ki na duniyā hai na diiñ
jis taraf tujh ko uThānā hai qadam dil se uThā

ghar to ab bhī duniyā ke dhuup hī meñ bante haiñ
kyuuñ uThā nahīñ letā saaya āsmāñ apnā

nā-murād duniyā meñ rah ke ḳhuub bhar paa.e
chal nikal chaleñ ai dil kuchh nahīñ yahāñ apnā

siikh duniyā hī meñ zāhid huur se milne ke Dhañg
varna ro.egā ki jannat meñ bhī rusvā.ī huī

jab koī ġham hī na ho ashk bahā.ūñ kaise
ḳhud ko duniyā kī adākārī sikhā.ūñ kaise

bach ke duniyā kī nigāhoñ se ḳhatā kar to luuñ
apnī nazroñ se magar ḳhud ko girā.ūñ kaise

hamārī ik ḳhatā ne ḳhuld se duniyā meñ lā pheñkā
agar dar-pesh duniyā se bhī phir koī safar aayā

najāt dī ġham-e-duniyā se dard-e-dil ne mujhe
ye ek raah milī ġham se chhūT jaane kī

tum aa.e aur sameT ke duniyā nikal ga.e
is umr ke sarāb meñ bhaTkā to maiñ bhī huuñ

hañstī hai mujh pe duniyā to hañstī rahe 'nabīl'
is ke muāmlāt pe hañstā to maiñ bhī huuñ

kaun jiine ke liye martā rahe
lo sambhālo apnī duniyā ham chale

gar badal jaate to thī duniyā kī har shai hasb-e-hāl
ham nahīñ badle to hai badlā huā aalam tamām

dil ke sivā kisī ko nahīñ jin kī kuchh ḳhabar
duniyā se kiyā bayāñ vo hikāyāt kījiye

kuchh bhī ho par in āñkhoñ ne akasr ye aalam bhī dekhā
ishq kī duniyā nāz-e-sarāpā husn kī duniyā ijz-e-mujassam