Tags-Duniya

duniyā ko bevafā.ī kā ilzām kaun de
apnī hī nibh sakī na bahut din kisī ke saath

andhī duniyā ko maiñ kaise samjhā.ūñ
in āñkhoñ se maiñ ne kyā kyā dekhā hai

na ḳhalvat-e-ġham-e-duniyā na bazm-e-jāñ 'tausīf'
tumhāre vāste ik bekasī kā ghar hai bahut

ho ga.ī hai mirī ujḌī huī duniyā ābād
maiñ use DhūñDh rahā huuñ ye batāne ke liye

'āzam' is vahshī duniyā meñ ham ne ye bhī dekhā hai
ḳhuun bahā jo apnoñ kā vo ḳhuun apnoñ ne chaaT liye

junūn-e-ishq kī manzil se vāqif hī nahīñ koī
hamārī chāk-dāmānī pe duniyā muskurātī hai

dekhne niklā huuñ duniyā ko magar kyā dekhūñ
jis taraf aañkh uThā.ūñ vahī chehra dekhūñ

ye vo darvāza hai kholūñ to koī aa na sake
aur agar band karūñ dil hī meñ duniyā dekhūñ

koī phal phuul nahīñ maġhribī chaTTānoñ par
chāñd jis gaañv se ugtā hai vo duniyā dekhūñ

hai na duniyā hī apnī na apnā ḳhudā
be-kasī ke ye din ab guzarte nahīñ

aḳhlāq se hasīñ koī duniyā meñ shai nahīñ
ye vo charāġh hai jo bujhāyā na jā.egā

dam ke dam meñ duniyā badlī bhiiḌ chhaTī kohrām uThā
chalte chalte saañs rukī aur ḳhatm huā afsāna bhī

duniyā badal ga.ī hai badal se ga.e haiñ kuchh
apnī ḳhushī badal ke tumhārī ḳhushī se ham

sharīk-e-hāl huī thī jahāñ kahīñ duniyā
faqat vahīñ se tirā hijr-e-mo'atabar kam hai

duniyā se ho ga.e na hoñ āzurda-dil kahīñ
phir is zamīn par na payambar palaT kar aa.e

kaun duniyā meñ rahe dīvāna hai
ek ujḌā sā musāfir ḳhāna hai

sun ke mab.hūt huī jaatī hai duniyā saarī
sher likkhe haiñ ki ejaaz kiyā hai maiñ ne

jo sotī bhiiḌ bā.is-e-ġhauġhā jagā.e phir
darvāza ghar kā us sag-e-duniyā pe bheḌ tū

jo chāho karo aaj se duniyā hai tumhārī
apnā jinheñ samjhā vo tumhāre nikal aa.e

bahut thā naaz jin par ham unhīñ rishtoñ pe hañste haiñ
hamīñ kyā rasm-e-duniyā hai ki sab apnoñ pe hañste haiñ