Tags-Duniya

haañ maiñ ne kabhī ḳhvāb meñ dekhī thī vo duniyā
'farhān' magar ab talak āñkhoñ meñ jalan hai

hosh jaatā rahā duniyā kī ḳhabar hī na rahī
jab ki ham bhuul ga.e ḳhud ko vo tab yaad aayā

mirā saaya mire bas meñ nahīñ hai
magar duniyā pe daavā kar rahā huuñ

band āñkhoñ meñ baḌī vus.at hai
band āñkhoñ hī se duniyā dekheñ

ġham parvarīda hai dil-e-shorīdgān-e-ishq
furqat kī ek raat hai duniyā kaheñ jise

bachche ne sajā.ī hai koī aur hī duniyā
khīñchā hai jahāñ baagh vahīñ rakkhā hai hiran bhī

insān ke liye is duniyā meñ dushnām se bachnā mushkil hai
taqsīr se bachnā mumkin hai ilzām se bachnā mushkil hai

ai bachpane kī duniyā to yaad aa rahī hai
dil se mirī sadā-e-fariyād aa rahī hai

dāman-e-husn meñ har ashk-e-tamannā rakh do
diin kī raah meñ hañgāma-e-duniyā rakh do

badal ke dekho kabhī nisbatoñ kī duniyā ko
badan ko ruuh ke ḳhāne meñ Daal kar dekho

kahne ko bahut kuchh thā agar kahne pe aate
duniyā kī ināyat hai ki ham kuchh nahīñ kahte

kuchh kahne pe tūfān uThā letī hai duniyā
ab is pe qayāmat hai ki ham kuchh nahīñ kahte

ham shikasta-dil na bahra-mand duniyā se hue
varna is ālūdgī se kis kā dāman paak thā

ḳhū-e-insāñ ko azal se hī ye duniyā tañg hai
jo varaq tārīḳh kā dekhā vo ibratnāk thā

urūs-e-jāñ nayā pairāhan-e-hastī badaltī hai
faqat tamhīd aane kī hai duniyā se guzar jaanā

ajal kī niiñd meñ bhī ḳhvāb-e-hastī gar nazar aayā
to phir bekār hai tañg aa ke is duniyā se mar jaanā

jis ne qaa.em kiyā ye rishta qalam se merā
ab kahāñ vo mujhe duniyā meñ dikhā.ī degā

mujh meñ kuchh hogā to duniyā ḳhud jhuk jā.egī
maiñ neze par sar apnā afrāz nahīñ kartā

jaise koī ziddī bachcha kab bahle bahlāne se
aise ham duniyā se chhup kar dekheñ ḳhvāb suhāne se

zāl-e-duniyā ne sulh kī kis din
ye laḌākā sadā se laḌtī hai