Tags-Duniya

ek anokhī lai se maiñ ne sab ke dil pighlā.e haiñ
duniyā ko ye vahm ki mere hoñToñ par hai apnī baat

tire jamāl se haT kar bhī ek duniyā hai
ye ser-chashm magar kab udhar ko dekhte haiñ

nukta-chīnī to fitrat hai insān kī kis kā shikva kareñ kis ko ilzām deñ
ḳhud hamīñ kaun se pārsāoñ meñ haiñ ham ko duniyā se koī shikāyat nahīñ

kuchh ye 'iqbāl' hī par nahīñ munhasir sargirānī musallat hai māhaul par
aql-o-dānish ke baḌhte hue bojh se sar uThāne kī duniyā ko fursat nahīñ

lamhe udaas udaas fazā.eñ ghuTī ghuTī
duniyā agar yahī hai to duniyā se bach ke chal

sham.a bujhtī hai to duniyā meñ sahar hotī hai
ai suḳhan-var tirā āġhāz hai anjām tirā

har dam duniyā ke hañgāme ghere rakhte the
jab se tere dhyān lage haiñ fursat rahtī hai

tumhārī duniyā meñ ā.eñge ham tumheñ gale se lagā.eñge ham
janāb ham ko mile jo fursat darāz-e-kār-e-jahāñ se pahle

ab koī aañkh nam nahīñ hotī
dil kī duniyā meñ ḳhushk saal hai ye

ġham kā har aalam nayā hai in dinoñ
dil kī har duniyā na.ī hai āj-kal

jab tak tujh ko maut na aa.e kar le rain-baserā baabā
aatī jaatī is duniyā meñ kyā merā kyā terā baabā

rah tirī chhoḌ ke kyuuñ jānib-e-duniyā aa.e
ham ko jiine nahīñ detī ye pashemānī bhī

kuchh na kuchh le kar hī kuchh detī hai duniyā is liye
ḳhud-ġharaz duniyā se maiñ daftar uThā kar le gayā

kahtī hai jo kahne do ye duniyā mujhe kyā hai
zindāni-e-ehsās meñ rusvā.ī kare kyā

merī duniyā sañvār dī us ne
merī rūh-e-ravāñ hai merā kirshn

fikr-e-duniyā-o-āqibat hī nahīñ
zāmin-e-do-jahāñ hai merā kirshn

merī duniyā meñ zarā dekh ki is duniyā ko
dekhne vāloñ ne ab tak kabhī dekhā hī nahīñ

na lete naam bhī vo zulm kā bhūle se duniyā meñ
agar itnā samajh lete ki hai pesh-e-ḳhudā jaanā

samajhtā koī jīte-jī to haañ ik baat thī 'sho.ala'
mire marne pe duniyā ne mujhe jaanā to kyā jaanā

bazm-e-hastī meñ aane ko aa.e sabhī ahl-e-dil ahl-e-dīñ shā.ir-o-falsafī
aadmī ko jo karnā thā kartā rahā aur duniyā ba-dastūr chaltī rahī