Tags-Duniya

riit bhī apnī rut bhī apnī
dil rasm-e-duniyā kyā jaane

duniyā vaalo āḳhir-kār turābī huuñ
maiñ hāthoñ par sūraj dharnā chāhtā huuñ

ḳhushī merī gavāra thī na qismat ko na duniyā ko
so maiñ kuchh ġham barā-e-ḳhātir-e-ahbāb uThā laa.ī

varna sīdhe-sāde sajde varna sīdhī-sādī hamdeñ
duniyā kyā aur kyuuñ ke hāthoñ bhārī patthar chuum rahī hai

ek hammām meñ tabdīl huī hai duniyā
sab hī nañge haiñ kise dekh ke sharmā.ūñ maiñ

mujh ko mirī shikast kī dohrī sazā milī
tujh se bichhaḌ ke zindagī duniyā se jā milī

vahī hai kāmil 'nazīr' is jā vahī hai raushan-dil ai azīzo
havā se duniyā kī jis ke dil kā na hove hargiz charāġh ThanDā

jo hosh meñ thā to koī na mai-ba-jām aayā
bahak gayā huuñ to duniyā chalī hai samjhāne

ek nazar meñ duniyā bhar se ek nazar meñ kuchh bhī nahīñ
chāhat meñ andāz nazar hī chāhat kā paimāna hai

ye kaisā kār-e-duniyā ho rahā hai
lahū insāñ kā sastā ho rahā hai

ḳhudā ābād rakkhe mai-kade ko
bahut saste chhuTe duniyā-o-dīñ se

laa.ī hai kahāñ mujh ko tabī.at kī do-rañgī
duniyā kā talabgār bhī duniyā se ḳhafā bhī

badalne ke liye betāb hai 'shahzād' ye duniyā
ravā jo chiiz thā ab nā-ravā hone hī vaalī hai

vahī dil hai vahī ḳhvāhish vahī tum ho vahī maiñ huuñ
mirī duniyā meñ āḳhir inqilāb-e-āsmāñ kyuuñ ho

maiñ chādar-e-tathīr kā detī huuñ vasīla
rakh lenā mire aiboñ ko duniyā se chhupā kar

simaT kar rah ga.ī hai vus.at-e-duniyā hathelī bhar
hamārā mas.ala ab bhī hamārī ḳhud-shanāsī hai

tum phir se uThā laa.e ho duniyā ko kahāñ se
ye to mirī sau baar kī Thukrā.ī huī hai

ġham-gusār is tarah se milte haiñ
jaise duniyā meñ kuchh huā hī nahīñ

vahāñ sahrā bhī hai jañgal bhī dariyā bhī chaTāneñ bhī
ajab duniyā basā rakkhī hai vo jis ghar meñ rahtā hai

jis tarah ham rahe duniyā meñ haiñ us tarah 'razā'
shaiḳh but-ḳhāne meñ ka.abe meñ barahman na rahā