Tags-Duniya

merā chehra kho gayā chehroñ ke is bāzār meñ
jaane kyā kyā ruup maiñ duniyā ko dikhlātā rahā

duniyā luTī to duur se taktā hī rah gayā
āñkhoñ meñ ghar ke ḳhvāb kā naqsha hī rah gayā

duniyā bahut qarīb se uTh kar chalī ga.ī
baiThā maiñ apne ghar meñ akelā hī rah gayā

sahrā meñ aab aur samundar meñ ret hai
yā-rab maiñ aaj kaun sī duniyā meñ aa gayā

tū ne pūchhā hai mire dost to maiñ sochtī huuñ
vo jo ik chiiz hai duniyā jise ġham kahtī hai

ishq kiyā to apnī hī nādānī thī
varna duniyā jaan kī dushman kab hotī hai

rashk se merā chehra taktī hai duniyā
jaan kī dushman us kī surḳhī-e-lab hotī hai

tamāsha-gāh-e-duniyā meñ tamāshā.ī rahe ham bhī
sahar kī aarzū ham ne bhī kī thī jalva-e-shab tak

shikva us but ke jafā kā jo kiyā maiñ to kahā
tum to duniyā meñ ho ik ahl-e-vafā tum ko kyā

ik fusūñ-sāmāñ nigāh-e-āshnā kī der thī
is bharī duniyā meñ ham tanhā nazar aane lage

phir tabāhī kī taraf hai duniyā
phir zarūrat hai payambar aa.e

vo apne haath meñ duniyā kī tahzībeñ uThā.e aa.egī aur gir paḌegī
maiñ naqshe kī madad se us ke girne kī ḳhabar dūñgā

jab se sīkhā hai hunar shīshagarī kā maiñ ne
bas usī din se ye duniyā hai ki patthar huī hai

ye bhī mumkin hai ki āñkheñ ho tamāshā hī na ho
raas aane lage ham ko to ye duniyā hī na ho

baḌe salīqe se duniyā ne mere dil ko diye
vo ghaao jin meñ thā sachchā.iyoñ kā charkā bhī

ye rasm hāsil-e-duniyā hai ik ye rasm-e-sulūk
hazār is meñ sahī nafratoñ kā iimā bhī

ḳhud-farāmosh jo paayā hai mujhe duniyā ne
mere hāthoñ se bhī luuTā hai mujhe duniyā ne

dil to be-dām bikā zehn kī qīmat na lagī
kaise bāzār meñ bechā hai mujhe duniyā ne

vaqf-e-jazbāt na hone kī sazā dī hai ajab
ātish-e-sard meñ phūñkā hai mujhe duniyā ne

ham-safar mujh ko banāne se gurezāñ hai magar
har na.e moḌ pe DhūñDā hai mujhe duniyā ne