Tags-Duniya

us ko zaḳhm mile duniyā meñ jis ne māñge taaza phuul
jis ne chāhī chhāñv kī chhatrī us ke sar par chhā.ī dhuup

maiñ ḳhush-nasīb bahut huuñ ki mujh ko duniyā meñ
qadam qadam pe mohabbat ke shāhkār mile

ab fikr is kī kījiye duniyā rahegī yā nahīñ
ab is ko jaane dījiye duniyā meñ kaisā kaun hai

isī duniyā ke isī daur ke haiñ
ham to dillī meñ bhī bijnor ke haiñ

ajiib dard kā rishta hai saarī duniyā meñ
kahīñ ho jaltā makāñ apnā ghar lage hai mujhe

duniyā hai kyā chiiz barābar dekh rahā huuñ
apnī aañkh se aage baḌh kar dekh rahā huuñ

tū hī duniyā ko samajh parvarda-e-duniyā hai tū
maiñ yūñhī achchhā huuñ sab se be-ḳhabar rakkhā huā

ab tū hī hamāre chāra-gar kar un kā mudāvā duniyā meñ
jo din bhar to phuul chuneñ aur raat ko kāñTe bo dete haiñ

mujh ko apnā kah kar sab se
mere pīchhe duniyā kar do

dil ko phir ummīd garmāne lagī
phir mujhe duniyā nazar aane lagī

aks kar dūñgā maiñ dīvār par apnā chehra
aur duniyā ise tasvīr kā dukh samjhegī

ham apne dil kī duniyā dekhte haiñ
hameñ ye shaġhl-e-bekārī bahut hai

duniyā kī fikr tujh ko mujhe thā tirā ḳhayāl
bas itnā farq tere mire sochne meñ thā

jahāñ dil ke badle meñ miltā hai dil
vo duniyā na jaane kahāñ hai miyāñ

maiñ ik faqīr-e-ḳhudā-mast barsar-e-duniyā
jamāl-e-yār kī hairat-sarā meñ rahtā huuñ

maiñ jāntā huuñ duniyā badal nahīñ saktī
ek ho kar ke sāgar ko math nahīñ saktī

duniyā se alag ham ne maiḳhāne kā dar dekhā
maiḳhāne kā dar dekhā allāh kā ghar dekhā

udhar malāmat-e-duniyā idhar malāmat-e-nafs
baḌā azaab hai aa.e hue havās mujhe

hai ye duniyā sharār kī mānind
bhaag is se farār kī mānind

baat hamārī maan ke gorī
sab duniyā se chorī chorī