Tags-Duniya

apne afkār liye pahlū-nashīñ ho ke rahā
dil se darvesh ne duniyā tirī apnā.ī nahīñ

hai zer-e-zamīñ saaya to bālā-e-zamīñ dhuup
duniyā bhī do-rañgī hai kahīñ chhāñv kahīñ dhuup

vo barham hoñge duniyā jaan legī raaz ulfat kā
vafā par harf aa jā.egā do aañsū bahāne meñ

balā se bijliyāñ girtī haiñ duniyā par gireñ lekin
maza miltā hai un ko dam-ba-dam yuuñ muskurāne meñ

jīte-jī qadr merī kisī ne na kī zindagī bhī mirī bevafā ho ga.ī
duniyā vaalo mubārak ye duniyā tumheñ kar chale ham salām āḳhirī āḳhirī

hameñ to fikr dil-sāzī kī hai dil hai to duniyā hai
sanam pahle banā deñ phir sanam-ḳhāna banā deñge

kyā sitam kar ga.ī ai dost tirī chashm-e-karam
jaise tere nahīñ duniyā ke gunahgār haiñ ham

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai

jo chāhtā hai vo tasḳhīr kar le duniyā ko
kisī bhī shai pe nahīñ hai yahāñ ijāra mirā

ham badalte haiñ ruḳh havāoñ kā
aa.e duniyā hamāre saath chale

hirs-o-havā kī is duniyā se bach ke raho to achchhā hai
behtar hai shīrāz kī dāvat se bas rūkhī roTī saag

alāva rāh-e-qalandar tamām duniyā meñ
kisī bhī raah se guzro zamāna paḌtā hai

duniyā ke saare meve is gulsitān meñ haiñ
sab nemateñ mayassar hindostān meñ haiñ

dekhā nahīñ vo chāñd sā chehrā ka.ī din se
tārīk nazar aatī hai duniyā ka.ī din se

khulī aur band āñkhoñ se use taktā rahā maiñ bhī
tirī duniyā ke pīchhe bhāgtā phirtā rahā maiñ bhī

sagī bahnoñ kā jo rishta rishta hai urdu aur hindī meñ
kahīñ duniyā kī do zinda zabānoñ meñ nahīñ miltā

duniyā meñ jafāoñ ke sazā-vār hamīñ haiñ
'mumtāz' ba-har-hāl gunāhgār hamīñ haiñ

shīsha-e-ābrū sambhāl ai dil
daur ulTā chalā hai duniyā kā

chalo miTā.eñ adāvat kī rasm duniyā se
vafā pe pahra na chāhat pe koī bandish ho

duniyā ko us nigāh ne dīvāna kar diyā
maiñ vo sitam-zarīf ki bas dekhtā rahā