Tags-Duniya

ek to duniyā kā kārobār hai
ishq kā us par alag āzār hai

is daur ke mardoñ kī jo kī shakl-shumārī
sābit huā duniyā meñ ḳhvātīn bahut haiñ

va.ada sachchā hai ki jhūTā mujhe ma.alūm na thā
kal badal jā.egī duniyā mujhe ma.alūm na thā

ishq-ābād ke naake hī se ruḳhsat hue hosh
hai ye dīvānoñ kī duniyā mujhe ma.alūm na thā

āshiq sā to saada koī aur na hogā duniyā meñ
jī ke ziyāñ ko ishq meñ us ke apnā vaarā jaane hai

ab mirī diid kī duniyā bhī tamāshā.ī hai
tū ne kyā mujh ko mohabbat meñ banā rakkhā hai

'sadā' ke paas hai duniyā kā tajraba vaa.iz
tumhārī baat meñ bas falsafa kitāb kā hai

kal to duniyā badal hī jā.egī
aaj un kā ye jaur-e-paiham hai

kaun hai jis kī mahrūmī ke daaġh haiñ us ke siine meñ
kaun hai jis ke ḳhvāboñ kī ik duniyā maiñ ne sajā.ī hai

taqdīr jise kahte haiñ duniyā ke mufakkir
zardār ke pīchhe hai to nādār ke aage

saare jahāñ ko raushan kar do
saarī duniyā nuur se bhar do

mirī nigāh se jab vo nazar milāte haiñ
dil-e-ġharīb kī duniyā ujaaḌ jaate haiñ

dil ko khoyā ḳhud bhī kho.e duniyā khoī diin bhī khoyā
ye gum-shudagī hai to ik din ai dost tujhe bhī khonā hai

tam.īz-e-kamāl-o-naqs uThā ye to raushan hai duniyā par
maiñ chandan huuñ tū kundan hai maiñ miTTī huuñ tū sonā hai

kyuuñ na duniyā ko ho ḳhushī 'ġhālib'
shāh-e-dīñ-dār ne shifā paa.ī

duniyā ko is baar fasāna kar dūñgā
ḳhvāboñ ko har samt ravāna kar dūñgā

aa jā.egī duniyā aslī hālat par
nāfiz har dastūr purānā kar dūñgā

duniyā vaale jis ko aksar ronā-dhonā kahte haiñ
āñkheñ dariyā ban jaatī hai jazboñ kī sayyālī se

samajh na tū us ko be-navā.ī ye do-jahāñ kī hai bādshā.ī
ki daulat-e-ishq haath aa.ī matā-e-duniyā-o-dīñ luTā kar

tumhārī duniyā ke bāhar andar bhaTak rahā huuñ
maiñ ba.ad-e-tark-e-jahāñ yahī par bhaTak rahā huuñ