Tags-Duniya

maiñ ek ḳhāna-ba-dosh huuñ jis kā ghar hai duniyā
so apne kāñdhoñ pe le ke ye ghar bhaTak rahā huuñ

ye bhī to sochiye kabhī tanhā.ī meñ zarā
duniyā se ham ne kyā liyā duniyā ko kyā diyā

bach jaa.e javānī meñ jo duniyā kī havā se
hotā hai farishta koī insāñ nahīñ hotā

sachche ushshāq to nāpaid hue duniyā meñ
ab koī shīrīñ-o-farhād nahīñ hone ke

ḳhushī ḳhushī tirī duniyā ko chhoḌ aa.e ham
ḳhushī kā jab koī sāmān hī nahīñ paayā

duniyā ke sānehāt ne dil ko rulā diyā
tahrīr hādsāt bhī karne nahīñ diye

miltī koī kalīd hī irfān-e-zāt kī
duniyā ne tajrabāt bhī karne nahīñ diye

haath aatī nahīñ kabhī duniyā
aur kabhī har dukāñ se miltī hai

mirā yaqīn ki duniyā meñ huuñ akelā maiñ
sadā-e-dil mujhe kahtī hai ġham-nashīñ koī hai

parda is meñ kyā hai pyāre duniyā meñ 'mārūf' hai ye
āshiq se hai bair tujhe aur ulfat jaanī auroñ se

jī meñ aatā hai ki duniyā ko badalnā chāhiye
aur apne aap se māyūs ho jaatā huuñ maiñ

baare bāġh-e-sehn-e-duniyā meñ bahut din rah liyā
ḳhush raho ab is galī se dosto jaatā huuñ maiñ

haiñ ḳhudāvandān-e-duniyā ham tahī-dastoñ se hech
dil ko hasrat thī to ham jaisoñ se ḳhil.at māñgtā

hikāyat-e-ġham-e-duniyā tavīl thī kah dī
hikāyat-e-ġham-e-dil muḳhtasar hai kyā kahiye

kabhī duniyā par us ke raaz kholeñ
kabhī apnī bhī āgāhī na paa.eñ

mirī duniyā meñ rahnā chāhtī haiñ
purānī sohbatoñ kī apsarā.eñ

mire dil kī duniyā udaas hai na to hosh hai na havās hai
mire dil meñ aa ke Thahar kabhī mire saath umr guzār de

duniyā ko bhuul kar tirī duniyā meñ aa gayā
le jā rahā hai kaun idhar se udhar mujhe

duniyā kā har nazāra nigāhoñ se chhīn le
kuchh dekhnā nahīñ hai tujhe dekh kar mujhe

dāman ko zarā jhaTak to dekho
duniyā hai kuchh aur shai nahīñ hai