Tags-Duniya

marne kī duā.eñ kyuuñ māñgūñ jiine kī tamannā kaun kare
ye duniyā ho yā vo duniyā ab ḳhvāhish-e-duniyā kaun kare

duniyā ne hameñ chhoḌā 'jazbī' ham chhoḌ na deñ kyuuñ duniyā ko
duniyā ko samajh kar baiThe haiñ ab duniyā duniyā kaun kare

duniyā jise kahte haiñ jaadū kā khilaunā hai
mil jaa.e to miTTī hai kho jaa.e to sonā hai

muflisī laakh sahī daulat-e-nāyāb hai ye
maiñ tire ġham ke evaz kyuuñ ġham-e-duniyā chāhūñ

ibrat-āmoz hai duniyā kā taġhayyur 'jāmī'
mujh se miltī nahīñ do roz kī tasvīr mirī

ta.ayyun se barī ho gar hai lā-mahdūd kā tālib
ki hadd-e-mulk-o-duniyā to vahīñ tak hai jahāñ tak hai

ġhubār-e-duniyā meñ gum hai jab se savār-e-vahshat
atash atash dasht o koh o dariyā pukārte haiñ

ab ham bhī sochte haiñ ki bāzār garm hai
apnā zamīr bech ke duniyā ḳharīd leñ

vo us kā āḳhirī bosa
jo is nafrat-bharī duniyā meñ

duniyā hasīn-tar hai magar ai mire ḳhudā
bhejā hai tū ne aur guzarnā mujhe bhī hai

saaqī kī navāzish ne to aur aag lagā dī
duniyā ye samajhtī hai mirī pyaas bujhā dī

duniyā kī koī baat nahīñ jānte 'riyāz'
ik shaḳhs haiñ 'riyāz' bahut hī ġharīb se

dekh anjām mohabbat kā burā hotā hai
mujh se duniyā yahī kahtī hai bas ik tum to nahīñ

sab ko ye fikr haath se ab ek pal na jaa.e
duniyā hudūd-e-vaqt se aage nikal na jaa.e

tū mere hamrāh khaḌā ho
saarī duniyā patthar le kar

'soz' pal pal badaltī duniyā par
kis tarah dil ko e'tibār aa.e

ye ġhazab baiThe-biThā.e tujh pe kyā nāzil huā
uTh chalā duniyā se kyuuñ tū tujh ko ai dil kyā huā

'shahzād' zindagī ke jhamele hazār haiñ
duniyā nahīñ pasand to aa aur dekh le

hameñ duniyā faqat kāġhaz kā ik TukḌā samajhtī hai
patañgoñ meñ agar Dhal jaa.eñ ham to āsmāñ chhū leñ

kahīñ pata na lagā phir vajūd kā mere
uThā ke le ga.ī duniyā shikār kis kā thā