Tags-Duniya

duniyā kī ne.amatoñ se ye serī hai ruuh ko
bosa bhī yaar de to kahūñ maiñ havas nahīñ

ġham-e-duniyā se gar paa.ī bhī fursat sar uThāne kī
falak kā dekhnā taqrīb tere yaad aane kī

pahle duniyā satā rahī thī mujhe
aap bhī ab satā rahe haiñ mujhe

ham is tarah se baTā.eñge haath duniyā kā
kuchh ek ġham na.e ījād karte jā.eñge

yuuñ tarāshe haiñ sanam kufr ke is duniyā ne
but-shikan hotā jo is daur meñ 'āzar' hotā

tishna-lab koī bhī duniyā meñ nahīñ rah paatā
merī ā.ankhoñ ke jo qabze meñ samundar hotā

har lahza badaltī huī duniyā ke makīno
kyā jāniye tum kaun sī manzil meñ paḌe ho

hai navāzā tujhe rāziq ne to phir ai insāñ
jitnī mumkin ho tū duniyā meñ saḳhāvat karnā

mashiyyat khelnā zebā nahīñ merī basīrat se
uThā le in khilaunoñ ko ye duniyā hai vo uqbā hai

ab mire zehn meñ bas lazzat-e-duniyā hai ravāñ
thak chukā huuñ tirī ulfat pe guzāra kar ke

ham abhī sohbat-e-duniyā meñ haiñ masrūf magar
koī shab tum ko bhī dekheñge gavāra kar ke

ham se ḳhāmosh tabī.at bhī haiñ duniyā meñ ki jo
us ko hī chāhte haiñ us se kināra kar ke

vaqt vaqt kī baat hai yā dastūr hai duniyā kā sā.īñ
din Dhalte hī baḌh jaatā hai qad se ḳhud saayā sā.īñ

kaan meñ mere chupke chupke kaun ye kahtā hai 'ishqī'
har din duniyā vahī purānī har shab ḳhvāb nayā sā.īñ

pahroñ dil se bāteñ kar ke chain se baiThe haiñ aise
jaise jo kuchh bhī kahnā thā duniyā-bhar ko sunā aa.e

tārīk huī saarī duniyā kyā maut huī mujh bekas kī
kam aise hue haiñ shahīd-e-vafā ġham jin kā ik aalam ne kiyā

aisā duniyā se jī ulajhtā hai
nahīñ duniyā meñ jaise ab kuchh bhī

ḳhudāvand mujhe taufīq de maiñ aise zinda lafz likkhūñ
jo na likkhūñ maiñ to duniyā bāñjh ho jaa.e

bharosā kar nahīñ sakte ġhulāmoñ kī basīrat par
ki duniyā meñ faqat mardān-e-hur kī aañkh hai biinā

sunāte haiñ tahat meñ jab ġhazal andāz meñ apne
pukār uThtī hai duniyā zauq ham kyā ḳhuub rakhte haiñ