Tags-Duniya

tirā ġham dil pe ifshā kar rahe haiñ
so dil se kār-e-duniyā kar rahe haiñ

unhī logoñ ko hai duniyā mayassar
ki jo us se kināra kar rahe haiñ

arz-o-samā hai vaqf-e-nigāh-e-umīd-o-yās
duniyā kī ūñch-nīch hamārī nazar meñ hai

maiñ ne duniyā kī nigāhoñ se bachā kar ai 'kalīm'
dil meñ rakkhā tirī yādoñ ko dafīnoñ kī tarah

tamām duniyā meñ DhūñD aayā maiñ gum-shuda zindagī kī sūrat
milī to mujh ko hayāt-e-muztar magar milī ajnabī kī sūrat

ye sach hai duniyā meñ aur hoñge jamīl-o-ḳhush-rū hasīn-o-dilbar
pasand aa.ī magar hameñ to janāb-e-man aap kī hī sūrat

ġham kī duniyā rahe ābād 'shakīl'
muflisī meñ koī jāgīr to hai

duniyā meñ añdheroñ ke sivā aur rahā kyā
ik terī tamannā so charāġh-e-saharī hai

mujh ko ḳhud mujh se bhī milne nahīñ detī duniyā
chhup ke miltā huuñ kabhī jab nahīñ hotā koī

sarf-e-allāh māl-e-duniyā kar
mard hai kuchh to bahr-e-uqbā luuT

jāntā duniyā ko hai ik khel tū
khel qudrat ke tujhe dikhlā.eñ kyā

ḳhauf aisā hai ki duniyā ke satā.e hue log
kabhī mimbar kabhī mehrāb se Dar jaate haiñ

kabhī karte haiñ mubāraz-e-talabī duniyā se
aur kabhī ḳhvāhish-e-betāb se Dar jaate haiñ

mujhe detī hai kyā kyā naam duniyā
tire kūche meñ chal kar dekhtā huuñ

ye dasht-e-havas hai jafāoñ kī duniyā
idhar kyuuñ hujūm-e-ġhazāl aa rahā hai

merī balā se saarī duniyā ujḌe yā ābād rahe
terī ḳhushbū jis meñ basī hai vo kamra ābād rahe

saare chehre dekh Daale saarī duniyā chhān lī
justujū ab tak yahī hai koī tum sā dekhte

aap banātā hai pahle phir apne aap miTātā hai
duniyā kā ḳhāliq ham ko ik ziddī bachcha lagtā hai

ek duniyā huī hai zer-e-nagīñ
shah-nashīñ ho gayā hai ḳhāk-nashīñ

duniyā kī mahfiloñ se uktā gayā huuñ yā rab
kyā lutf anjuman kā jab dil hī bujh gayā ho