Tags-Duniya

kahīñ haiñ duniyā kī rañgīniyāñ ta.āqub meñ
kahīñ jhalaktā hai merī har ek baat meñ ishq

maiñ tanhā.ī ko apnā ham-safar kyā maan baiThā
mujhe lagtā hai mere saath duniyā chal rahī hai

aañkh jo kuchh dekhtī hai lab pe aa saktā nahīñ
mahv-e-hairat huuñ ki duniyā kyā se kyā ho jā.egī

duniyā dekhī kab bachchoñ ne
c c plus plus jaavā dekhā

muddatoñ meñ aaj dil ne faisla āḳhir diyā
ḳhūb-sūrat hī sahī lekin ye duniyā jhuuT hai

maze vo paa.e haiñ aarzū meñ ki dil kī ye aarzū hai yārab
tamām duniyā kī ārzūeñ mire liye intiḳhāb kar de

nazar nā aane pe hai ye hālat ki jañg hai shaiḳh-o-barahman meñ
ḳhabar nahīñ kyā se kyā ho duniyā jo ḳhud ko vo be-naqāb kar de

vaqt-e-āḳhir hameñ dīdār dikhāyā na gayā
ham to duniyā se ga.e aap se aayā na gayā

sab natīja hai apnī karnī kā
ye jo duniyā meñ aaj hotā hai

haañ mere vāste hai taḳhsīs kā ye pahlū
duniyā samajh rahī hai andāz-e-be-ruḳhī hai

mumkin nahīñ ki dāman be-dāġh ho kisī kā
sach pūchhiye to duniyā kājal kī koTharī hai

us ko duniyā meñ koī aañkh dikhā saktā hai kyā
'rashk' jis qaum meñ ehsās hai bedārī hai

vo kis duniyā se aa.e haiñ vo kis duniyā ke baasī haiñ
banāte haiñ jo gahre pāniyoñ meñ qabr miTTī se

isī duniyā meñ baste haiñ ajab kuchh log aise bhī
jo pal meñ khīñch sakte haiñ ridā-e-jabr miTTī se

tirā hī duniyā meñ hai fasāna tirā hī shaidā.ī hai zamāna
tire hī ġham meñ huiiñ ravāna nikal ke rūheñ ḳhudā.ī bhar kī

jo us ne zid kī to aafat aa.ī duhā.ī dene lagī ḳhudā.ī
qayāmat us bevafā ne Dhaa.ī idhar kī duniyā 'sharaf' udhar kī

merī duniyā ke taqāzoñ hī pe mauqūf nahīñ
diin bhī ek nayā fikr-o-nazar māñge hai

diin o duniyā ho ki ho ishq o havas ai 'saġhar'
har koī ḳhūn-e-jigar ḳhūn-e-jigar māñge hai

dekh aao marīz-e-furqat ko
rasm-e-duniyā bhī hai savāb bhī hai

mujh se vo aañkh churātā hai to yuuñ lagtā hai
saarī duniyā mirī jānib nigarāñ ho jaise