Tags-Duniya

yahī nahīñ ki maiñ nā-mutma.in huuñ duniyā se
mirā vajūd bhī ik mas.ala rahā hai mujhe

mo.ajiza hazrat-e-īsā kā thā be-shubah durust
ki maiñ duniyā se gayā uTh jo kahā qum mujh ko

mujh ko duniyā ke samajhne meñ zarā der lagī
maiñ zarā ḳhvāb ke andar se nikaltā huā thā

is duniyā meñ nayā tamāshā
har saa.at har pal dekhoge

ek duniyā banā ga.ī miTTī
jis ghaḌī ruuh pā ga.ī miTTī

surḳh-rū hai vo saarī duniyā meñ
saath jis kā nibhā ga.ī miTTī

yahāñ jo bhī thā tanhā thā yahāñ jo bhī hai tanhā hai
ye duniyā hai ye duniyā hai isī kā naam duniyā hai

thī purānī film duniyā
chehre sab dekhe sune the

ishq hai aur kāñToñ kā bistar husn hai aur phūloñ kī sej
tujh ko kaise samjhā.ūñ ye duniyā kā dastūr hai chāñd

terī tābish se raushan haiñ gul bhī aur vīrāne bhī
kyā tū bhī is hañstī-gātī duniyā kā mazdūr hai chāñd

ḳhushk āñkhoñ se uThī mauj to duniyā Duubī
ham jise samjhe the sahrā vo samundar niklā

saath duniyā kā nahīñ tālib-e-duniyā dete
apne kuttoñ ko ye murdār liye phirtī hai

shām-e-taklīf kī duniyā meñ sahar ho to sahī
haa.e kam-baḳht kahīñ dard-e-jigar ho to sahī

tum merī duniyā meñ bilkul aise ho
taash meñ jaise hukum kā ikkā hotā hai

aage baḌhā.iye to qadam aap 'ja.afarī'
duniyā ab aisī vādī-e-pur-ḳhār bhī nahīñ

ai dāna-hā-e-gandum dekho na muskurā ke
maiñ phir pahuñch rahā huuñ duniyā kī ḳhaak uḌā ke

dekhnā us ko bhī paḌtā hai miyāñ duniyā meñ
sāmne jo yūñhī be-kār meñ aa jaatā hai

phūTeñ mirī āñkheñ jo kuchh aatā ho nazar bhī
duniyā se alag chiiz hai furqat kī sahar bhī

ye duniyā hai bhalā kab merā maskan
yahāñ to shab-guzārī kar rahā huuñ

kahāñ tum bhī ibādat kar rahe ho
agar maiñ duniyā-dārī kar rahā huuñ